Rampawn-a hnathawk te chungchang ah Social Media a insawichhiatna duhtawk tawh turin ngen

BJP Mizoram Pradesh Thupuangtu, Lalremsangi Fanai chuan ram pawna hnathawk tura awm ten harsatna an tawh chungchangah Social Media-a insawichhiatna chu duhtawk tawh turin a ngen.

Nimin-a Aizawl Press Club-a thuthar thehdarhtute a kawmna ah Lalremsangi Fanai chuan rampawn a Housemaid hnathawk te harsatna chungchang leh tunhnaia Mizo nula pahnih, an awmna ten dik lo taka an puh avanga Tan In-a rei tak an awm hnuah dam taka an lo haw theih nana an hmalakna hrang hrang a sawi a, hemi chungchang ah hian Consulate Office a thawktute leh Zela Ralte ten an hmazawn ah theihtawp an chhuah thu a sawi a, Chief Minister Lalduhoma pawh India ram pawna Mizo thalai hnathawk mangangte ngaihsaktu a nih thu sawiin, ama sum senga ram pawna harsatna tawkte a lo puih thin tawh thu a sawi bawk a, amah ngei pawh harsatna tawkte puih kawngah BJP-a a nihna chu hmang tangkaiin sawrkar laipui leh Embassy-ah pawh kawngro a sut phah tih a sawi a ni.

Lalremsangi Fanai chuan ‘The Mizoram Private Placement Agencies (Regulation) Act 2015’ in a sawi, “Beyond the boundaries of the State of Mizoram” tih ziak chu inhnialna tura pawimawh ber a ni lo tih pawh sawiin, Deputy Commisionner leh Superintendent of Police ten dan an kalpui leh kenkawh dan tur leh Agencies ten an zawm ngei ngei tur chiang taka an chhuah te chuan India ram pawna hnathawk tur thawnchhuah theihna kawk a ziak tel lo tih a sawi a. Mizoram State in dan kan siam ve theih chu India Sovereignty chhung huam chauh a ni tih sawiin, “DC Office, Superintendent of Police ten Placement Agencies leh Housemaid te chunga Act & Rules chhunga an mawhphurhna kenkawhna chungchangah an tihtur an ngaipawimawh lo a. Housemaid chungchang harsatna bultanna hi Mizoram sawrkarin Private Placement Agencies Act & Rules hnuaia Controlling Authority DC Office, Verification ti tu Superintendent of Police Office an ni,” a ti a. “Agencies ten dan hnuaia thilti anga insawi dan bawhchhe fai vek, Security awmlo a  mihring a sumdawnna an kalpui lui tlat hian buaina leh harsatna namen lo ah Mizo nula te hnuk lutin mi ramah in chhanchhuah ngai hial in kan awm ta a nih hi,” a ti a. “Social Media lama thudik tawklo hmanga insawiselna leh inchotuahna, indeusawhna ang chi hi duhtawk tawh ila. Mizoram Sawrkar in hmalam hunah enge a tih, enge hmalakna awm tih thlirin, rilru i seng vek ang u,” a ti bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar