Tuialhthei khuahkhirhna tawp

Mipui ten tuialhthei an lak theih zat bithliah siam chu nimin zing atang khan hlih a ni a, Supply Department Director Saizikpuii chuan kawng chhia avanga April ni 25 atanga Silchar Depot a tuialhthei dawn theih a nih loh avangin Silchar atanga tuialhthei la thin te chuan Guwahati atanga lak a ngai ta a, hei vang hian lirthei lo lut chu a muan deuh thu a sawi a. Hetihlai hian Mizoram-ah tuialhthei hi phurluh reng a nih avangin tun dinhmuna Mizoram-a Oil awm zat enin mipui tan chi-aina tur a awm lo tih a sawi a ni. Supply Department Director chuan Inrinni leh Pathianni khan Mizoram-ah tuialhthei Kilolitre 738, MS Petrol kilolitre 791 leh Petrol Xp Kilolitre 48 lutin nimin pawh khan rawn phurhluh leh a nih thu a sawi bawk. Assam-a Lumding leh Bardapur inkara Rel kawng chhia hi tun thla ni 10 velah chuan tha tura beisei a ni a, tuialhthei harsatna pawh hi ziaawm chho tura beisei a ni bawk.