Thenawm ram atangin raltlan an rawn luh belh leh

Myanmar tualchhung buaina chuan reh lam pan lovin a la zual zel niin a lang a, tunhnaiah Chin State-a tihluihna a Sipai tan tir an duhloh avangin Lawngtlai District-ah raltlan mi 100 dawn an rawn luh belh leh nia thudawn a ni.

Thuneitute sawi danin heng raltlan rawn lut te hian Lawngtlai District an pan bakah Khawzawl District pan mi 6 an awm a, an vaiin tunhnaia lo lut te hi mi 95 an ni a, Arakan Army-ah tan luihtir an duhloh vanga Mizoram lama rawn tlanchhe ta niin thudawnna chuan a sawi.

Raltlan lo lut thar te hi April ni 30 khan Hruitezawl-ah mi 47 an lo lut a, thudawn danin heng lo lut te hi kum lama naupang tak tak, Chin State-a Paletwa hmuna Arakan Army ten an pawl sipai-a tang tura an nawr luih duhlo a rawn tlanchhe ta an ni a. Paletwa khua ah hian Arakan Army te chuan kum lama naupang zawk te chu sipai zawm vek turin hriattirna an chhuah a, Hruitezawl a lo lut zingah hian hmeichhe 7 pawh an tel nia thudawn a ni bawk.

Hetihlai hian Bangladesh Chittagong Hill Tracts-a Kuki Chin National Army ten thuneihna sang zawk an ngiatna kalzel ah henglai a Zohnahthlak, Bawm Hnam te chu sahimna zawnga mi engemaw zat Lawngtlai District-a an lo luh hnuah nimin zing lam dar 2:00 vel khan chhungkaw 18, an vaiin mi 124 ten Lawngtlai District an lut leh a, nimin chawhnu lam khan chhungkaw khat luh belh lehin tun tuma Bangladesh atanga Lawng-tlai District-a rawn lut hi an vaiin mi 127 an ni a. Heng Bangladesh raltlan lut thar zinga 21 te chuan Khawmawi, Hruitezawl, Hmawngbu, Bungtlang South leh Vathuampui an pan a, a bak zawng chu Chamdur 'P' a an awm lailawkna tura ruahman Community Hall-ah awmtir rih an ni a. Heng mi te hi an mamawh hrang hrangte sawrkar chuan a ngaihtuah sak mek a ni.

Comments

Popular News (Last 30 Days)

Vawiin-ah HSSLC Exam result