Lungsen huamchhung ah kawng siam hna chawlhtir

Lunglei leh Tlabung inkar kawngpui National Highway 302 kawngpui laih mekah ram neitu thenkhatin zangnadawmna an la lak loh avangin nimin atang khan Lungsen huamchhunga hnathawh te tiam chin awm lovin chawlhtir a ni.

Lungsen Area Land Owner Association for NH-302 a Chairman Thangrema sawi danin he kawngpui laih hian an khua, Lungsen huamchhung a paltlang dawn avangin kum 2020 khan Compensation First Phase sem a ni tawh a. First Phase hi kum 2021-ah sem zoin kum 2022-ah Additional sem tura ruahman leh a ni a. Tuna Lungsen huamchhunga zangnadawmna la dawnglo mi 35 te chu Additional a sem tur zinga telh niin hun rei tak chhung an nghak tawh niin an sawi a. Heng mite hi Lungsen VC-I leh Lungsen VC-II bakah Rangte VC huamchhunga mi te an ni tih sawiin, inbiakremna angin an ram pawh laih sak an awm nual tih a sawi a. Hetihlai hian inbiak-remna anga zangnadawmna pek an ni leh vat lo chu hriatthiam harsa an tih thu an sawi a, NHIDCL nawr nan thawktute chu chhunzawm tawhlo turin an duh tih a sawi a ni. 

Lungsen Area Land Owner Association for NH-302 Chairman chuan zangnadawmna hmu silo a kawng sial a zawh hman chuan zangna-dawmna an hmuh tur ang hmuh loh an hlau tih sawiin, chhungkaw harsa ve tak tak an nih thu leh kawng tha an duh vangin pawisa hmu hmasa lo in an ramchhungah kawng an lo sial tlang tir tawh thu a sawi a. Thla hmasa ni 15 hmaa chanchin lawmawm an hriat loh chuan a tul anga hmalak an tum tawh chu CALA leh NHIDCL lam ten lo ngaichang lawk tura an tih angin an ngaichang leh a, tun thlenga thu lawmawm an la hriat loh avangin nizan hmasa a an pawl thukhawm chuan an huamchhungah tiamchin awm lova hnathawkte chawlhtir phawt ni nise tih an rel tih a sawi a ni.