Dan ang thlapa MLA leh CEM hna thawka hlawh pawh a lak kawp theih thu RM Chakma-a’n a sawi

Tuichawng bialtu MLA leh Chakma Autonomous District Council (CADC)-a CEM Rashik Mohan Chakma chuan dan ang thlapin MLA leh CEM a nih kawp theih thu leh hlawh pawh a lak kawp theih thu a sawi.

Nimin-a Aizawl Press Club-a thuthar thehdarhtute a kawmna ah Tuichawng Bialtu MLA leh CADC-a CEM Rashik Mohan Chakma chuan Dan hriat loh avangin mi dik te hmuh dik loh in an awm thin tih sawiin, Office of Profit chungchang ah Dan a hriat thu leh tunhnaia CADC-a ZPM MDC, DD Chakma-a’n Governor hnena a hekna avangin rilru hrehawmna leh hlauhthawnna a neih loh thu a sawi a. “Min hekna avangin mi tam takin dan bawhchhia emaw min ti a, Election Commission of India (ECI) in dan a rawn sawifiah takah chuan mipuiin rilru dik an put theih nan thudik hi puanchhuah a ngai a ni,” a ti.

Rashik Mohan Chakma chuan Office of Profit chungchangah hian hman atang tawhin ngaihdan fuh lo a awm tih sawiin, Sixth Schedule hnuaia ADC-a MDC leh CEM posts te chu India Danpui hnuaia Office of Profit a nih loh avangin MLA nen a nih kawp theih thu leh Office of Profit dan an bawhchhe lo tih a sawi a, “CEM hna ka thawh avangin CEM hlawh ka la thiang a, MLA hna ka thawh avangin MLA hlawh pawh ka la thiang a ni, thawh hlawh chu la tur reng ka ni e,” a ti a. “Mizoram Assembly dan lo siam ve hmangin Office of Profit chungchangah MLA te ban theih angin Law Department pawhin ‘Dan bawhchhia, disqualify theih’ angin Governor-ah Observation an siam niin ka hria a. Tun hnuah chuan Dan hi zirchiang tawh thin se, Office of Profit chungchanga High Court Judgement lo awm tawh te leh ECI opinions lo puanchhuah tawh te zirchiang lovin Observation siam tawh lo se ka duh a ni,” a ti bawk.

Minister hlui leh Hachhek Bialtu MLA ni mek Robert Romawia Royte hekna chungchang pawh RM Chakma chuan sawiin, “A fapa Firm in sawrkara contract a thawh avanga Pu Robert-a hi Office of Profit dan bawhchhiaa puh a ni a. An puhna points hrang te ECI in a zirchian hnuah Pu Robert Romawia Royte hian dan a bawhchhe lo tiin Governor hnenah Order tichhuak turin December 2023 khan hriattir a ni a, Gazzette pawh a chhuak tawh a ni,” a ti a. “He Judgement atanga lang chiang chu Chief Minister/Minister/MLA te fapa, fanu, nupui leh a dangte, an chenpui ngei te pawhin sawrkar ah Contract leh Supply an thawk thei tih a tichiang a. He Judgement a Interesting deuh chu Minister leh MLA ten Consultancy Services an tih hi Office of Profit danin a khap lo tih hi a ni,” a ti bawk. RM. Chakma chuan a tul apianga finchhuaha tanpui thintu Robert Romawia Royte MLA leh an party hotute chungah a lawmthu a sawi bawk a ni.