MPSC Combined Examination-a Mark pek danah thil dik lo tih a awm lo - Inquiry Officer

Mizo Zirlai Pawl (MZP) in MPSC hnuaia Mizoram Combined Competitive Examination leh ACF hna lak dan a thil fello awm ni a an puh chungchang chhui tura sawrkarin a ruat, Inquiry Officer M. Lalmanzuala chuan an thil chhuina ah diklo engmah a hmuh loh thu a sawi.

Nimin-a Aizawl Press Club-a thuthar thehdarhtute a kawmna ah MPSC hnuaia hna lak dan chhuitu Inquiry Officer M. Lalmanzuala (IAS Rtd) chuan Mizoram sawrkarin hemi chungchang chhui chiang tura a tih chhan chu, ‘Candidate tling ve tura inngai khan an tlin loh chhan kha Answer Sheet a Mark thaichhiat kha thupbo lo se tling pha ve turah kan inngai an tihna a ni ber’ niin a sawi a, amaherawhchu hemi chungchangah hian thil diklo a awm lo tih sawiin, “MPSC in tihdan phung an nei tawh a, Evaluator No. 1 in an chhanna a en a, hetah hian Mark a lo pek kha, No. 2 in a en leh dawn khan Correcting Fluid a thaireh a ni a, hei hi Complain awm chhan ber chu a nih hmel,” a ti a. Exam Paper-a thaichhiat leh Correcting Fluid awm chungchang sawifiahin, “Evaluator No. 1-in a endik zawhah Evaluator No. 2-in a endik hmain a Mark pek zat a hriat lohna atan Answer Paper-a Mark pek chu pen hmang leh Correcting Fluid hmanga thaichhiat a ni. Mahse, uluk taka en chuan Mark an pek zat hi Mark pekna tura tiha an Mark pek zat nen a inmil vek. Thaichhiat a nih avang khan thil dik lo a awm lo,” a ti. Dan dik takah chuan Answer paper-ah Mark pek loh tur a nih thu IO chuan sawiin, “Answer sheet-a Mark pek a thiang lo,” a ti a. Chutihrual chuan hetianga Answer paper-a Mark pek thaichhiat hi tun tuma thil thleng thar ni lovin tunhma kum 10 vel kalta atanga an lo tih tawh thin dan a nih thu a sawi bawk.

MPSC-a thawktute an Office-ah an lut ru nia sawi awm chungchangah, “MZP-te an awm loh takah khan Direct Recruitment lama thawktu mi pathum chuan an hotute nen inberawnin, a karleh mai-a Interview ko tur an nih avangin Office an kal a ni. A ruka lut pawh an ni lo, Police ho pawhin an luh leh chhuah an hre vek. Thu kan zawtfiah ve ve. Chu bakah, kan hnuchhuina atana pawimawh te chu Confidential Branch-ah kalh hnan vek a ni a, luh theihna an nei lo hrim hrim,” a ti bawk.

Jr. Grade of Mizoram Forest Service (Asst. Conservator of Forest) lak tur chung-chang an chhuina pawh sawiin M. Lalmanzuala chuan, a thiam leh qualification nei tha te Qualification kha Recruitment Rules-ah a awm miau loh avangin tun tumah hian lak a ni ta lo nia a hmuh thu a sawi bawk a. MPSC-in tih dik loh engmah an nei lo tih chu a hmuhchhuah tih sawiin, “Exam endikna ah Chairman leh Secretary an inrawlh lo hrim hrim. Interview tur an koh chinah chiah tute nge Interview tura koh an nih an hria,” tiin, Interview an zawh hma chuan Written-a an Mark hmuh zat pawh an hriat ve loh thu a sawi bawk.

Nimin-a thuthar thehdarhtute zawhna chhangin Inquiry Officer M. Lalmanzuala chuan MSSSB din duhlo tu a ni tih a sawi a, “A chhan chu India Danpui kalh a nih vang a ni,” tiin “MPSC in hna lak chungchangah harsatna an nei lova, hei hi chu thenkhatin an duhsak zawng te thun nan an hman duh vang mai a ni,” a ti bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar