ZPM Policy tam zawk Horticulture kutah a awm niin sawi

Horticulture Department changtu Minister Prof. Lalnilawma chuan ZPM policy tam zawk chu Horticulture department kutah a awm niin a sawi.

Nimin-a Sairang leh Lengpui-a an Department Warehouse a tlawhna ah Horticulture Department changtu Minister Prof. Lalnilawma chuan Horticulture chu kan ram ei leh bar intodelh nana Department pawimawh tak a ni tih sawiin, sawrkar in hmun hrang hrangah Warehouse leh Godown engemaw zat a neih te chu tangkai zawka hman dan an ngaihtuah chho zel tih a sawi a, Department dang nena tangkawpin thlai thar chhek-khawl nan te pawh hman dan an ngaihtuah chho zel dawn tih a sawi a ni. Horticulture Minister chuan kan ram-a thing leh maute chhawr tangkai dan tur an ngaihtuah thu sawiin, “Kan rama Mau te hi quality tha tak tak a ni a, Mau hmang hian thil tam tak a siamchhuah theih a, meihawl mai bakah furniture tha tak tak, ram pawna thawnchhuah theih khawpa tha a siam theih a, thalai hna zawng mekte leh heti lama talent nei tha tak takte tan kawl a eng zel dawn a ni,” a ti bawk.

He hunah hian Adviser to Chief Minister Dr. KC. Lalmalsawmzauva chuan kan ram ei leh bar a kan intodelh theih nan Mizoram sawrkar chuan theihtawp a chhuah tih sawiin, “Thlai thar lei tur thlangchhuakin chumi tihlawhtling tur chuan theihtawp a chhuah a ni,” a ti a. Mipuiah beiseina dik lo siam siam an tum ve lo tih sawiin, “Kan tih theih ngei tur erawh chu chiang takin kan sawi a, hma pawh kan la mek a ni,” a ti a. “Kuthnathawktu ten an thawhrim rah an seng ngei hi kan duh a, mipui ten kan lakah beiseina sang tak neiin ZPM min thlangtling a, mipute tih beidawn hi ZPM chuan kan tum lo a ni,” a ti bawk.

Sairang leh Lengpui-a Warehouse hrang hrang a tlawhna ah hian Minister hi Horticulture Department-a Secretary leh Director te bakah Officer dangte leh ZIDCO Chairman ten an tawi-awm bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man