Champhai DC in raltlan te awmna hmun a tlawh

Champhai District Bawrhsap leh District Level Committee on Myanmar and Bangladesh Refugees-a Chairman James Lalrinchhana chuan nimin khan Khuangleng khaw lu-a raltlante awmna hmun Refugee Camp chu a tlawh.

Champhai District Bawrhsap hian Khuangleng Village Level Committee on Myanmar and Bangladesh Refugees in raltlan te tana chenna leh nitin mamawh phuhruk hna an thawh dan te enfiahin, Raltlan khuah-khirh leh chhawmdawl kawngah Village Level Committee-te chu District Level Committee thuchhuah leh Sawrkarin inkaihhruaina a siamte tha taka kengkawh turin a chah a. Thuthar leh hmalak ngaite bawhzui nghal zel tur leh District Level Committee hnena thil awmzia thlen nghal zel turin a chah a. Raltlante pawh ram dante leh sawrkar thuchhuahte tha taka zawm tura chahin, khawtlang hmalakna tha taka thlawpa tawiawm zel turin a chah nghal bawk.

Khuangleng Village Level Committee on Myanmar and Bangladesh Refugees tarlan danin tun dinhmunah Khuangleng khuaah hian Myanmar atanga raltlan mi 84 vel an awm mek a; an zinga mi 64 hi Refugee Camp-ah awmin a dang 20 te hi khawchhungah In luahin an khawsa a ni.