MPSC Chairman leh Member te hi bang tura nawr chi an ni lo - JC. Ramthanga

Mizoram Public Service Commission (MPSC) Chairman JC. Ramthanga IAS(Retd) chuan MPSC Chairman hna a chelh chhungin hmasawnna leh hlawhtlinna tam tak an neih thu sawiin, MPSC Chairman chu thubuai engemaw vanga Supreme Court-in thiam loh a chantira President-in a ban a nih ngawt loh chuan bang tura nawr chi a ni lo tih a sawi.

MPSC Chairman JC. Ramthanga hi MPSC-a a thawh hun bi a tawp tak avangin superannuation pension in a chhuak a, nimin khan MPSC Examination Hall-ah amah thlahna hun hi buatsaih niin he hunah hian JC. Ramthanga chuan kum 2 vel MPSC Chairman a nih chhunga MPSC hmasawnna leh hlawhtlinna – building tih changtlun te, Officer leh Staff te Service siam that leh State dangte tihdan tha entawn chunga MPSC Examination kalphung siam danglam ngaite tifel tura theihtawp a chhuahna ah Secretary leh Officer te bakah Staff ten nasa taka an tawiawmna ah lawmthu a sawi a. Heng hmasawnna hnathawh te hi lehkhabu-a siam a ni tih a tarlangbawk.

MPSC Chairman kalchhuak tur chuan MPSC chu India ram Danpui, Constitution a chuang, Constitutional Body a nih angin Chairman leh Member te ruat theih dan leh ban theih dan tur pawh tarlan vek a ni tih a sawi a. “Criminal Case avanga Supreme Court in thiamloh a chantir a bang tlaka a ngaih a, India President in a ban a nih ngawt loh chuan tumahin Chairman bang tura nawr chi a ni lo,” a ti a. Tunhnaia MPSC in beihna a tawh ah thawktute tanrualna chu lawmawm a tih thu pawh sawiin, Chief Minister meuhvin Press mite hma ah Inquiry Report-ah MPSC dik lohna an hmuh loh thu leh Report chu sawrkarin a pawm tih a sawi chu a lawmawm takzet tih a sawi a. MPSC zahawmna humhalh a, a zahawmna leh rintlakna vawngnung zel turin Officer te leh Staff te chu a fuih bawk a ni.

MPSC Chairman hna hi kum 62 an nih thleng emaw, kum 6 chhung emaw-ah a hmasa zawk zawk an nih thleng chelh theih a ni a, JC. Ramthanga hian a, June 21, 2022 khan MPSC Chairman hna hi chelh tan a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar