Thlai thar leina atan Warehouse sak a ni dawn

Chief Minister Lalduhoma chuan, ZPM kaih-hruai sawrkarin thlai thar pali te an leina turah a dahkhawmna tur Warehouse tam tham tak an sak dawn thu a sawi.

Tunhnaia thuthar thehdarhtute a kawmna ah thlai thar lei an tumnaa an hmalak dante zawhna chhángin Chief Minister chuan, “A hmasa berah chuan warehouse sak a ni phawt a, Hmunphiah chìnna hmun paruk-ah warehouse lian deuh deuh kan sa dawn a, a sakna tur sum pawh Finance-in kan pe fel tawh,” tiin Model Code of Conduct a tawp veleh bawhzui nghal a ni dawn tih a sawi a. Thlai dang lâkkhawm nan mipui tana pan awlsam tur laiah Collection Centre tur Warehouse an sak phawt dawn thu pawh a sawi a. “Horticulture leh Department dang atang hian Warehouse dang 20/30 sak belh tur kan nei a, sum kan nei sa diam tawh. Heng hi chu Sawh-thing leh Hmarcha zone ve deuh a ni. Agriculture Link Road 46 kan lài dawn. Handholding lam thil atana tangkai tur kawng tha kan mamawh avangin kan tihsak dawn,” a ti.

Chief Minister chuan thlai tharte chu mi pakhatin lei sen a ni loh avangin a hmun azirin an then hrang nuai dawn tih sawiin, “A leitu turte dawr mek kan nei a, engemaw zatin ‘kan ti duh’ an rawn ti a, min rawn dawr tawh a, kan hruaitute'n an thliar hrang mek,” a ti a, a then chuan loan laka lian taka tiha sawngbawl nghal theih an duh thu a sawi bawk.

Thlai tharte lei leh sawngbawlna kalpui turin mi in loan an lak theih nan Guarantor-ah sawrkar a tan a ngaih thu pawh Chief Minister chuan a sawi a, Congress sawrkar laia siam ‘The Mizoram Ceiling on Government Guarantees Act, 2011’ avangin an tan theih loh thu a sawi a. Dan hi siamthat tumin an nei mek tih sawiin, June 6-ah Cabinet-in a ngaihtuah dawn thu leh a tul chuan Ordinance pawha an kalpui tur thu a sawi bawk.

Comments

Popular News (Last 30 Days)

LPG man bithliah thar