Khumtung khuaa Vawk thi ASF vang tih finfiah a ni

Serchhip District chhung Khumtung khuaa tunhnaia Vawk thi te Sample enfiah ah African Swine Fever (ASF) hmuh a nih avangin nimin atang khan Khumtung khua hi ‘Infected Area’ ah puan nghal a ni.
Serchhip-a AH&Vety Department hotute hnen atanga thu kan dawn danin tunkar Thawhtanni khan Khumtung khuaa chhan hriat loha Vawk thi te chu RAT hmanga enfiah a nih hnuah tunlaia Vawk hri leng mek, African Swine Fever (ASF) hri kai nia rinhlelh a ni a, hei vang hian an Sample te hi uluk zawka enfiah leh turin lak a nih hnuah nimin khan Aizawl-a AH & Vety Department Laboratory-ah enfiah niin an Sample enfiah pahnih ah hian ASF hi hmnuh a ni ve ve ta a ni.

Hetianga Khumtung khuaa Vawk thi te ASF avanga thi an ni tih finfiah a nih hnu hian hri a darh zel loh nan Serchhip-a District AH & Vety Officer Dr. H. Vanlalrawna chuan ‘The Prevention & Control of Infectious and Contagious Disease in Animal Act, 2009 Section 20 of Sub-Section 1’ in thuneihna a pek angin nimin, May 9, 2024 atanga thu leh awm hma chu Serchhip District-a Khumtung khua hi Vawk hri lenna hmun, Infected Area-ah a puang a. Infected Area atang hian Vawk, Vawksa leh Vawksa atanga thil siam reng reng lakchhuah emaw, lakluh emaw khap tlat niin Vawk talh leh Vawksa zawrh pawh khap tlat a ni a. Vawk thi reng reng paih mai lovin Chinai/Disinfectant nen thuk taka phum tur niin Vawk thi an awmin AH & Vety Department Official te hnenah hriattir vat tur a ni bawk.

Comments

Popular News (Last 30 Days)

LPG man bithliah thar