Mizoram-a Rel lut tur chungchangah NGOCC in zau zawka inrawnkhawmna hun an buatsaih

Mizoram-a tlawmngai pawl hrang hrang intelkhawm, NGO Coordination Committee (NGOCC) chuan nimin khan Mizoram chhung Sairang leh Hmawngbuchhuah thlenga Rel kawng kal tir chungchanga inrawnkhawmna an buatsaih.

Central YMA Committee Room, Aizawl-a inrawnkhawmna hun hi Central YMA President Lalhmachhuana chuan kaihruaiin, hmasawnna ruhrel tha Mizoram in a neih turah ngaihtuahna fim tak pu chunga inpuahchah a tul thu sawiin, tun tuma an inrawnkhawmna chu hmalak nghal vut vut na tur ai mahin ngaihdan lakkhawm a, mipuite pawh zau zawka inrawnna atana hman a ni dawn tih a sawi a. RTI Act hmanga zawhna CMO-in a chhan dan chuan, ‘Rel kawng kal lehzel turah sawrkarin mipui ngaihdan a la anga, mipui ngaihdan anga kal a ni ang’ tih a nih thu sawiin, “Chuvangin mipui huapzau thei tur anga kan ngaih kan inkokhawm a ni,” a ti a. Sairang atanga Hmawngbuchhuah thleng Rel kawng a kal chuan a tha leh tha lo zawngte, Environment leh Economy lamah te, inchimralna kawngah te nghawng a neih theih avangin NGOCC chuan uluk taka ngaihtuahna sen tul an tih thu a sawi bawk.

He inrawnkhawmna ah hian NGOCC Member te bakah Central YMA CEC, Home Department, Police Department, Revenue Department, Aizawl DC Office, Political Party, Environment kaihhnawiha pawl dingte leh Economist-te sawm an ni a. North-Eastern Frontier Railway Consultant R. Hrangtawna chuan Mizoram chhunga Rel kawng siam hnathawh leh Survey dan leh hmalak mekna te a sawifiah a. Rel lo lut turah mipuite duh angin an inpuahchah tha tawk lo hle nia a hriat thu leh hnathawk tur lakna Exam hrang hrang Mizo zingah ngaihven an awm loh thu a sawi bawk. 

Bairabi leh Sairang inkar Rel kawng siam hna hi kumin December-ah zawh tura ruahman a nih thu NFR Consultant chuan sawiin, tunah hian Bairabi atanga Rel kawng siam chhoh mek ah Sub-Station Hortoki, Kawnpui leh Mualkhang te chu hna tam zawk thawh a nih tawh thu te, Rel kawng siamna atan hian sum a tira ruahman cheng vbc. 2383 chuang hret niin, ennawn hnuah cheng vbc. 8266 chuang hret anih thu te a sawi bawk a. Tuna Sairang thleng Rel kawng siam bakah hian Hmawngbuchhuah thleng Rel kawng KM 223-a thui siam turin ruahmanna siam leh mek niin Preliminary Survey neih a ni tawh a, Lei 110 leh leiverh KM 98.63 a thui awmin, Station 16 a awm dawn a. Tunah hian Final Survey nei turin ruahmanna a fel tawh a ni.