Mizo Footballer pahnih te chawimawina hlan

Indian Super League (ISL) 2024 zawhfel taka Champion Team Mumbai City FC player pawimawh pahnih Lalengmawia Ralte leh Lallianzuala Chhangte-te chu nimin khan Sports Minister Lalnghinglova Hmar chuan a Pisa-ah lawmpuina hun a buatsaih.

Heng Footballer pahnih lawmpuina hunah hian Sports Minister chuan Lalengmawia Ralte leh Lallianzuala Chhangte-te chu Mizo hming timawitu an ni tih sawiin, “Kan chhuang takzet a ni,” a ti a. An thawhrimna avanga hetiang dinhmun thleng chho thei hi an nih thu leh an nun-a entawn tur pawimawh pakhat a hriat chu an in ngaihtlawmna chu a nih thu sawiin, “An ei chak zawng zawngte, an tih chak zawng zawngte ti lova an insum theihna avanga tun dinhmun thleng thei hi an ni a, Mizo thalaiten an nunah entawn tur kan ngah hle a ni,” a ti bawk.

India hi khawvel huap Football-ah sang lem lo mah se India Team a tel phak ringawt pawh a har tih Sports Minister chuan sawiin, an pahnih hian India team-ah 1st Eleven chang ngei tura ngaih leh beisei an nih thu a sawi a. Lallianzuala chu ISL-ah Season khat aia tam goal 10 khung thei awmchhun niin Final-ah ‘Man of the match’ niin Indian Super League an Champion theihna tura thawhhlawk ber a nh thu a sawi a. An pahnih hian lawmpuina thilpek a hlan bawk a ni.

Chief Minister Lalduhoma pawhin Social Media kaltlangin Indian Super League 2023-2024 a Champion Mumbai City Football Club a Mizo player pathumte a lawmpui thu a sawi a. Chief Minister hian Mumbai City Football Club-a khel Mizo player pathum Lallianzuala Chhangte, Lalengmawia Ralte leh Hmingthanmawia te a chhuan thu sawiin, Mumbai City Football club pawh an club history-a a vawi hnihna atana an Champion leh ta chu a lawmpui thu a sawi a ni.

Lalengmawia Ralte leh Lallianzuala Chhangte-te hi India in World Cup qualifier match a khelh leh turah India tana khel tura koh an nih thu thulakna chuan a tarlang a, Lalengmawia Ralte hian Master degree Exam hmachhawn dawn avangin India Team hi a zawm dawn lo niin thulakna dang chuan a tarlang bawk.