Dan lova hnamdang Bawngsa zuar te ngaimawh

Mizo Bawngsa Zuar Association te chuan hnamdang, dan lova Bawngsa zuar te chu an ngaihmawh thu leh hnawk an tih thu an sawi.

Nimin-a Aizawl Press Club-a thuthar thehdarhtute an kawmna ah Mizo Bawngsa Zuar Association te chuan heng hnamdang Bawngsa zuar te hian phalna an neih an hriat loh thu leh an ILP neih an chhuichian pawhin ILP pek an nihna anga hmang lo, Cement Mistiri, Helper leh Construction hna thawk tura ILP pek an nih tlangpui thu an sawi a. Phalna nei lo a hnamdangin sumdawnna an ti ve ngawt chu dan kalh a nih thu leh dan palzutna, ram leilung fate chanvo chhuhna lian tak a nih thu an sawi.

Mizo Bawngsa Zuar Association te chuan Bawng talha eizawng Mizo zingah pawh hnamdang thurualpui a lo hum tlat te, mahni hming hawhtira sumdawnna kalpui engemawzat an awm chu lungchhiatthlak an tih thu sawi bawkin, Mizoram chhunga Bawng talh a eizawnna chu a ram leilung fate ngeiin kalpui tha an tih thu leh hnamdang kut a he eizawnna a awm tur leh an kut a sum leh pai luanglut nasa lutuk chu ram leh hnam tan a him loh avangin Mizo mipuite tanrual a tul takzet tih an sawi a. Tun thla ni 13 hnu lamah chuan hnamdang dan lova sumdawn nana Bawngsa zuartu zawng zawng te lo inthiar fihlim tur leh lo zuar ve tawh lo turin an hriattir a. Veng tin-a YMA, Local Council leh Veng mipuite chu anmahni thlawp vek turin an sawm bawk a ni.