Serchhip District Cricket Team te lawmpuina leh chawimawina hun buatsaih a ni

Cricket Association of Mizoram (CAM) hnuaia District hrang hrangte Cricket-a inelna, ‘3rd Inter District Cricket Tournament’ neih zawh taka Serchhip District Cricket Association (DCA) Team te an Champion lawmna leh chawimawina Inkhawm chu nimin khan neih a ni.
Serchhip DC Conference Hall-a Serchhip District Cricket Team te lawmpuina leh chawimawina hun hman hi District Bawrhsap leh Serchhip District Sports Committee (SDSC) Chairman David Lalthantluanga chuan khuallian nia hmanpuiin Serchhip DCA chu pawl naupang te ni siin hun reilote chhungin hlawhtlinna ropui tak an chang chu lawmawm a tih thu sawiin, “Serchhip District mipui ten kan chhuang che u,” a ti a. Cricket chu India rama Sports lar ber a nih angin players te tan eizawnna tling a nih thu pawh sawiin, India Team a tel phak tan phei chuan Field chhung leh pawnah hausak pui lawihna tham Game a ni tih a sawi a, Mizo infiammi Cricket a tui te chu tan la turin a fuih bawk. Bawrhsap chuan Serchhip District Cricket Association hruaituten sum leh pai leh hmunhma infrastructure nei tha lo chungin theihtawp tak meuh an chhuah thu pawh sawiin, Mizoram District inelnaah Serchhip Team-in Champion dinhmun hial an luah thei chu lawmawm a tih thu a sawi a, players te chu an pawl hruaitute inpekna hre reng turin a chah nghal bawk a ni.


3rd Inter District Cricket Tournament-a Serchhip District Team te Champion lawmna hun hi Serchhip District Cricket Association President HD. Lalhmachuana chuan kaihruaiin Ser-chhip District Team enkawltute hnen atangin April 23-27, 2024 chhunga Champhai-a 3rd Inter District Cricket Tournament neih zawh taka Serchhip District Team te chet dan Report ngaihthlak niin Serchhip District Sports Committee atangin lawmpuina thusawi ngaihthlak a ni bawk.

Cricket Association of Mizoram (CAM) buatsaih Mizoram District hrang hrangte Cricket-a inelna, 3rd Inter District Cricket Tournament-ah hian Mizoram District 8 ten Team tirin Group pahnih-ah then an ni a, Serchhip District Team te hian Group match tum thum an khelh ah hnehna chang vekin intihsiakna thlengtu Champhai District nen Final an khel a. Final-ah hian Wicket 8-a hnehna changin a tum khatna atan Inter District Cricket Tournament-ah hian an Champion a ni. Final Match-ah hian Half Century siamtu Vanlalhruaia, Serchhip DCA chu ‘Man of the match’ atana thlan niin Player of the Tournament lawmman chu Suraj Singh, Serchhip DCA hnenah hlan a ni a, ani hian run 132 siamin Wicket 9 a la, Wicket 9 latu Hmingthanpuia, Serchhip DCA chuan Best Bowler lawmman a dawng bawk a. Nimin-a anmahni lawmpuina leh chawimawina hunah hian Serchhip Cricket Champion Team leh Coaching Staff te hnenah lawmpuina pawisafai hlan niin Serchhip District atanga Mizoram Cricket Team a tel pha mi pathumte hnenah chawimawina hlan an ni bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar