Mizoram State Project Monitoring Committee in hnathawh hrang hrang an enfiah an thlirho

Mizoram State Project Monitoring Committee te chu nimin khan an Chairman leh Chief Minister Lalduhoma hovin an thukhawm a, he hunah hian tunhnaia hmasawnna hnathawh hrang hrang an en te thlirho niin heng atang hian rawtna mumal tak duangin a mawhphurtu Department lama thehluh nise an ti.

Chief Minister Conference Hall-a nimin-a thutkhawm neih ah hian Chief Minister Lalduhoma chuan Monitoring Commitee te inpekna leh thawhrimna ah lawmthu sawiin, an hnathawh chuan rah tha tam tak a chhuah ngei dawn tih a hrilh a. Hemi hnu hian Vice Chairman R. Lal Rinawma'n tunhnaia a hmun tlawha an endik heng- Lengpui Airport tihchangtlunna hnathawh mek leh Lengpui Motor Sports Project thawh mek te, Maumual Protective Home-a Brick Wall Boundary Fencing thawh te, Solid Waste Management Centre, Hualngohmun-a thawh mek te leh Ropuiliani Freedom Fighter Museum, Kelsih a thawh mek te report a pe a. A kalpui zel dan tur chipchiar an sawi zui a ni.

Lengpui Airport bikah hian Flyover Bridge Concrete Work an thawk zo tawh a, Bitumen Work erawh a that tawk loh avangin a thawktute pawhin tihnawn leh an tum thu an sawi a. Terminal Building hlui a Double Height awmna lai Void slab chu la chhun loh a ni a, a bungrua erawh lei tawh a ni. Void Slab hian hna dang thawh zel tur a tihkhaihlak theih avangin thla thum chhunga thawh zawh ngei ni se an ti a, Ceiling leh Electric Wiring te, Canopy leh thildang thawh tur a la awm nual a, rang taka hna chhunzawm tul tiin Fire Safety Inspection pawh neih ngei nise tha an ti bawk.

Heng bakah hian Baggage Make-up Area pahnihna tur thawh mek te, Airport Sinage mawi leh changkang tak neih a tul thu te, Security thil te, Power supply mamawh belh thu te, hnathawh mek tichak tura pindan awmsa siksawi vat a tul thu te, hna thenkhat a tira Estimate a awm lo, a hnua han bilh tel leh tak te pawh a tul anga bawhzui chak tha an tih thu te sawi a ni a. Baggage Make-up Area siam zawh tawhah hian a rang lama Conveyor Belt dah a nih tur thu pawh tarlan a ni. Heng bakah hian thil dang pawimawh Departure Ramp leh Aero Bridge chungchang te, hnathawktu Department te inkarah thawhhona tha a awm a tulzia te pawh an sawi a, Contractor chungchang pawh hi zirchian ni se an ti bawk.

Lengpui Motor Sports Circuit hi Rural Electrification Corporation Limited CSR Fund cheng vbc.. 7.5, SASCE sum cheng vbc. 8 leh State sum cheng vbc. 2.5, a vaiin cheng vbc. 18 senna tur niin CCR Enterprise, Lengpui ten an thawk mek a. Nodal Department chu Mizoram State Sports Council a ni. A hmunhma laih (formation cutting) an zo tawh a, tunah hian pavement an thawk mek a. An hnathawh tawh chin hi a tha thawkhata ngaih a ni a, Chiahpui atanga a hmunhma panna kawng erawh hi chu a chhuk chhovin a zim deuhva ngaih a ni a. Hnathawh mek te hi uluk taka enzui zel tha an ti.

Maumual-a hmeichhiate enkawlna In, Protective Home hi Article 275 sum cheng nuai 125 senga brick wall fencing hna thawh niin hna hi an thawk tha nia an hmuh thu an sawi a. SASCE sum cheng vbc. 16.64 senga Solid Waste Management Centre, Hualngohmuna thawh mek chu enfiahin Nodal Department chu UD&PA niin V. Lalbiakzama chu Contractor a ni a,  Mobilization Advance cheng nuai 73.07 pe tawhin a hmunhma buatsaih hna an thawk mek a. He hmalakna hi uluk taka zirchian leh vil zui a tul niin an ngai a ni.

Heng bakah hian Ministry of Tribal Affairs sum cheng vbc. 18 senga Kelsih-a Ropuiliani Freedom Fighter Museum chu enfiah niin Rollins Engineer ten a sak hna an thawk mek a, Hna thawh mek hi uluk taka vil zui a ngaiin an hria a. He Project hi central sawrkar lamin an ngaihlu hle a kumina rawn hawn hman hial an duh a. Hei vang hian a hlawhtlin ngei a tul hle tih an sawi a ni.