SASCI sum-ah Chief Minister thu diklo sawi ah puhin a tul angin MLP in bawhzui zel an tum tih an sawi

MNF Legislature Party hruaitute chuan Chief Minister Lalduhoma’n MNF sawrkar lai, kum 2022-23 a SASCI Part-I sum cheng nuai 20000 lapse anga a sawi chu thu dik lo a nih thu sawiin, SASCI sum pechhuak mai lova ZPM sawrkarin a suasam chiam chu a tul angin Central Ministry-ah pawh an bawhzui dawn thu an sawi.

MNF Legislature Party hruaitute hian nimin khan an Leader Lalchhandama Ralte hovin Aizawl Press Club-ah thuthar thehdarhtute kawmin May 3, 2024-a Chief Minister Lalduhoma’n Press Conference a neih tun khan mipui hriat ah thil dik lo chiang tak a sawi niin an sawi a. Chief Minister Lalduhoma’n MNF sawrkar lai, kum 2022-23 a SASCI Part-I sum cheng nuai 20000 lapse anga a sawi chu thu dik lo a ni tih sawiin, “Hemi kum hian Mizoram tan cheng nuai 40000 sanctioned a ni a, cheng nuai 40000 man hna chu Tender vek niin Contractors ten hna pawh tha takin an thawk a. Kha Financial Year chhung khan 2nd instalment kha lo chhuak hman lo mah se a taka hnathawh vek a nih avangin cheng nuai 20000 chu a kum lehah a hma kum-a Unpaid Bill pek nan Central sawrkar Finance Ministry chuan a rawn released full leh vek a ni,” an ti a. “Tichuan kum 2022-23 a cheng nuai 40000 chu a kimin Mizoram in kan hmu a, sum lapse pakhatmah a awm loh avangin hnathawh bill zawng zawng pe tur pawhin MNF sawrkar khan harsatna a nei lo. Projects zawng zawng tha taka thawh vek a ni,” an ti.

Hei bakah hian kum 2023-24 ah Central sawrkar Finance Ministry chuan Mizoram tan SASCI Part-I hnuaiah cheng nuai 50,000 allocation a pek leh thu leh a hma kuma Unpaid bills pek tlak nan cheng nuai 20000 additional a sanction tel bawk tih sawiin, he cheng nuai 20000 hi khatihlaia CM in a bika a dil leh Union Finance Minister hmaichhana a sawpui anga rawn pek belh niin sum a lapse ta lo niin an sawi.

Nikum September 6 khan kum 2023-24 atan SASCI Part-I sum hi cheng nuai 46,255 dawng lehin, February 2, 2024-ah Mizoram Finance Department in cheng nuai 414 chuta tang chuan cheng nuai 20,000 chu MNF sawrkar in a hnathawktu Implementing Department-ah a pechhuak nghal a, a bang cheng nuai 26,669 chu Model Code of Conduct a lo awm zui tak avangin Finance Department in a kawl zui ta niin an sawi a. December thla tirah ZPM Sawrkar thar lo piangin, sawrkar hmasa in dan ang thlapa PWD Registered Contractor a lo ruatte chu hnathawk hlei thei lova siamin, “SASCI Guidelines leh sanction Terms & Conditions-ah State Finance Department in ni 10 chhunga sum hi Implementing Department kuta pekchhuah tur a tih laiin, ZPM sawrkar chuan 1st instalment sum cheng nuai 26,669 hi kum 2023-24 Financial Year a liam ni, ni 31.3.2024-ah pawh release lo vin a la kawl tang lui tlat a ni,” an ti a. 1st instalment pawh an pekchhuah duh loh avang hian 2nd Instalment tura sanctioned thlap tawh cheng nuai 23,331 chu a lapse ta vek niin an sawi a ni.

MNF Legislature Party hruaitute chuan cheng nuai 23,331 lapse hi a tam tham hle nia sawi bawkin, “Veng leh khaw tam takin an tuar dawn a, he sum atanga hmasawnna ruhrel rotling tam tak siama chumi paha GST leh Labour cess atanga cheng nuai sang bi sawrkarin a chang tur chu khatih laia MNF Sawrkar leh Central sawrkar duh dan leh sanction dan a nih laia sawrkar tharin a ti lapse vek mai hi keini MNF Legislature party chuan pawi kan ti a. A mawhphurtu Chief Minister & Finance Minister Pu Lalduhoma hian mipuiah ngaihdam a dil ngei ngei turah kan ngai a ni,” an ti.

SASCI sum pechhuak mai lova ZPM sawrkarin a suasam chiam chu a serious tih sawiin MNF Legislature party chuan, “Zoram mipui thlavang hauh nan Governor pawh sawipui kan tum a, a tul dan a zirin Central Ministry ah pawh bawhzui zel a ni ang,” an ti bawk.

Comments

Popular News (Last 30 Days)

LPG man bithliah thar