Sawrkar in Sports-ah ‘Hand Holding Policy’ a nei dawn

Sports Minister Lalnghinglova Hmar chuan Mizoram sawrkarin Sports-ah ‘Hand Holding Policy’ a neih dawn thu a sawi.

Mizoram States Sports Council buatsaih ‘Non Residential Coaching Programme 2023-2024’ thlirletna nimin tlai a a Pisa-a neih ah MSSC President leh Sports Minister Lalnghinglova Hmar chuan Mizoram sawrkar in Sports-ah ‘Hand Holding Policy’ an nei dawn tih sawiin, “Naupang Sports lama ti thei zawn-chhuahna tur Mizoram-ah Coaching Programme nei tura ruahmanna kalpui tum a ni,” a ti a, ruahman ang chuan Coach ten khaw pakhatah ni 15 chhung Coaching an pe anga , Coach kal lam leh haw lam hi Coach kalna khua in tumin Coach hlawh erawh sawrkar in a tum dawn a ni.

India rampum huap tur National Sports Conclave chu June ni 13-14, 2024 chhung khian Baptist Convention Centre, Falkland-ah neih tum a nih thu leh hemi buatsaihna tur hi sawrkar laipui atangin pawisa pawh hmuh a nih tawh thu Sports Minister chuan sawiin, India in Olympic 2036 chu Gujarat-ah a thleng dawn a, tun atanga inbuatsaih a ngaih thu a sawi a. “Sawrkar hmasa in hma al o lak tawh vangin Sports Infrastructure kan nei tha a. Hemi chhawr thei tur hian infiammi kan neih that a ngai, chutiang tur hian Coach leh Trainners kan tan angai hle,” a ti bawk. 

Mizoram States Sports Council (MSSC) Non Residential Coaching Programme hi naupang infiamna lama tuiten man chawi lova an zir theihna a ni a. Kum 2023-24 ah Sports discipline hrang hrang 9- Table Tennis, Judo, Athletics, Basketball, Boxing, Football, Tennis, Wrestling leh Weight-lifting-ah te kalpui a ni a. Heng ah hian mipa 322 leh hmeichhia 14 an vaiin 430 ten training an nei mek a ni. Nimin-a he programme thlirletna hunah hian Sports Association hruaitu bakah MSSC hnuaia coach leh Trainners te an tel a ni.