Lenkawl

Tunkar Zirtawpni, April 19, 2024-a Mizoram Lok Sabha Inthlanpui neih tur atan tluang takin inbuatsaihna chu tluang taka kalpui mek zel a ni a, tun tum Inthlanpui-ah hian Polling Station 1276 awmin Venhimna uluk lehzuala kalpui ngai Polling Station 14 a awmin heng te hi ramri hnaih a awm khaw hrang hrang a mi te an ni tlangpui a ni.

Lok Sabha Inthlanpui neih turah Vote tla a that theihna turin Inrinni zing khan Serchhip Bazar ah 'Photo Exhibition & Street Play' neih a ni.

Inter-District Boxing Championship 2024 neih turah Serchhip District Boxing Association chuan Boxer 45 a tir dawn a, Vawiin atang hian Camp an nei tan ang. 19th Inter District Boxing Championship 2024 hi tun thla ni 23-26 chhung khian Aizawl Ramhlun Boxing Hall-ah neih tura ruahman a ni a, kar kalta Ningani khan Serchhip District Boxing Association chuan Serchhip Boxing Hall-ah selection neiin he Championship-a tel tur hian Boxer 45 an thlang a, Coach pakhat in a hruai dawn a ni.

Presbyterian Kohhran hnuaia Kohhran Pavalai Pawl rampum huap Intawhkhawm vawi 6-na nimin Pathianni hmanga East Lungdar-a neih chu nizan khan a tiak ta a, Mizoram hmun hrang hrang atangin palai 6000 vel zet an kal a ni. Kum 2026-a Rampum huap Kohhran Pavalai Pawl Intawhkhawmna hi Serchhip-ah neih tur niin Serchhip Pastor Bial in a thleng dawn a ni.

Baptist Church of Mizoram (BCM) New Serchhip Pastor Bial Kristian Naupang Pawl (KNP) Inkhawmpui vawi 3-na chu nimin Pathianni hmang khan BCM Biak In Ebenezer, Serchhip P&E Veng-ah neih a ni.

Lok Sabha Inthlanpui neih tur atana Campaign chuan a vawrtawp a thleng chho mek a, Candidate mi 6 zinga mi 4 te chuan Serchhip-ah hun an hmang tawh a ni.

Naktuk Pathianni zan thleng awh tur Presbyterian Kohhran hnuaia Rampum huap Pavalai Pawl Intawhkhawmna chu nizan khan East Lungdar khua ah neih tan a ni.

Lok Sabha Inthlanpui neih turah Serchhip District-a Absentee Voters Essential Service (AVES) te tan tun thla ni 13 atanga 15 chhung khian Postal Ballot hmanga Vote thlakna hun hawn a ni dawn a, he ruahmanna hnuaia Vote thlak phalsak te tan zing dar 9:00 atanga tlai dar 5:00 thlengin Serchhip DC Office-a SDC-I Room ah Vote hi thlak theih a ni dawn a ni. Candidate ten an duh chuan an aiawhin Vote thlak lai endiktu tur Agent an ruat (appoint) thei a. Candidate te emaw, an Election Agent ten anmahni hmingin Appointment hi ziakin an siam thei ang. PVC Agent ruatna atan Form-10 (format for appointment of Polling Agents in Polling Stations) hman theih a ni.

Lok Sabha Inthlanpui neih tura Independent Candidate Lalhriatrenga Chhangte chuan Mizoram MP atan thlantlin a nih chuan mipuite nen an inbiaka an inkhawmna atan thla tin hun siam a tum thu sawiin, Independent atanga thlantlin a nih chuan Mizoram mipuite tan a tangkai thei zawk dawn niin a sawi bawk.

Lok Sabha Inthlanpui neih turah Serchhip District-a mahni In lama Vote thlak thei turte chu nimin atang khan an chenna In-ah kalchilhin Vote thlak tir tan an ni.

Tun thla ni 19-a Mizoram Lok Sabha Inthlanpui neih turah Serchhip District pumah Vote nei thei 54,607 an awm a, an zinga 414 te chu Service Voters an ni.

Serchhip-a Excise & Narcotics Department leh Serchhip Sub-Hqrs. YMA Anti-Drug Squad te chuan nimin zing dar 9:30 vel khan Chhiahtlang dai, Lamchhip kawng (Darzika Road) peng-ah Heroin nia hriat Hawng 10 an man a, heng ruih-hlo an man hi gram 119.46-a rit niin a neitu nia hriat Lalchhanhimi (47), Chhiahtlang Hmar Veng nia insawi pawh manin thubuai siam sak nghal a ni. Heng damdawi te hi chawhmeh (thlai rah) karah thuhruk a ni.

Mizoram Lok Sabha Inthlanpui tun thla ni 19-a neih turah Vote nei thei mi 8,56,364 an awm a, Vote nei thei zingah Mipa aiin Hmeichhia an tam zawk a ni.

Serchhip District-a Vote thlakna khawl, Electronic Voting Machine (EVM) awm mek te chu Lok Sabha Inthlanpui neih tura hman turin nimin khan buatsaih tan a ni.

Lok Sabha Inthlanpui neih tura Indian National Congress (INC) Candidate Lalbiakzama chuan nimin khan Serchhip District rawn tlawhin Serchhip leh Khawlailung khuaa Street Campaign-ah te thu a sawi.

Nimin April 10, 2024 khan World Homeopathy Day chu khawvel hmun hrang hrangah hman niin Thenzawl a Integrated AYUSH Hospital (IAH) Conference Hall-ah pawh he ni pual hian hun hman a ni a, Homoeopathy in kawng tinrenga hma a sawn theih nan a Research pawimawhna te zirho a ni.

Tun thla ni 19-a Lok Sabha Inthlanpui neih tur atan Vawiin atang hian Serchhip District-ah kum upa leh Vohbik te chu an In lamah Vote thlak tir tan an ni dawn ta.

Lok Sabha Inthlanpui neih tura Serchhip District chhunga Polling Party-a tel turte tana ni 2 awh Training chu nimin khan Govt. Serchhip College-ah chhunzawm leha zawhfel a ni ta a, nimin a Training-ah hian Polling Officer (PO) te telin an Duty-na tur hmun an pan hmain Training tum khat neih leh tru a ni anga, hetah hian an kalna turte tifelin Vote thlakna bungrua te pek nghal an ni ang.

Haryana (Rohtak)-a REC Combine National Level Talent Hunt Programme 2023-2024 neih a Boxing-a Gold Medal latu North Vanlaiphai Boxer TC. Malsawmkimi chuan nimin khan an khua (North Vanlaiphai) thlengin khawtlang huapa ropui taka lo hmuah a ni a, TC. Malsawmkimi D/o Peter Lalrintluanga, Rahsi Vêng, North Van-laiphai hian National Gold Medal hnekchhuak tur hian Final-ah Uttarakhan Boxer Jaya Bhist chu Unanimous Decision hmangin a hneh a ni. TC.Malsawmkimi hi mipui ten lirthei nên lo hmuakin khawchhung fanpui a nih hnuah Rahsi Veng Bazar Shed-ah a lawmna hun buatsaih zui a ni a, mipui thahnem tak telin lawmpuina thilpek chi hrang hrang an hlan bawk a ni.

Kum kalta 2023 chhung khan Serchhip District-ah Malaria hrik pai mi 47 hmuhchhuah niin Malaria vanga thi mi pakhat a awm a. Kum hmasa 2022 aiin nikum chhung khan Serchhip District-ah hian thisen enfiah tlem zawk mah se Malaria hrik pai hmuhchhuah erawh an tam zawk a ni.