Serchhip-a EVM te hman theih tura buatsaih a ni

Serchhip District-a Vote thlakna khawl, Electronic Voting Machine (EVM) awm mek te chu Lok Sabha Inthlanpui neih tura hman turin nimin khan buatsaih tan a ni.
Serchhip-a EVM awm te Inthlanpui atana hman theih tura buatsaihna atan hian nimin zing dar 9:00 khan District Bawrhsap David Lalthantluang, IAS, District Election Officer ni bawk kaihhruaina hnuaiah Serchhip DC Office-a EVM dahna Strong Room chu hawn a ni a, he hunah hian Political Party hrang hrang aiawh te, chanchinbumite leh Election Official te bakah Senior Micro Observer Robert Zosangliana te an tel a. Strong Room hawn a nih hnu hian MJA aiawhte leh political party aiawh kalkhawmte chu an duh ang taka EVM te enchiang tur leh zawhna an neih te zawtfiah tura hriattir an ni a, anni hian engmah sawisel leh sawi buai tur an neih loh thu an sawi a ni.

Hetianga EVM dahna hawn a nih hnu hian 2nd Randomization neih a nih tuma Polling Station hrang hranga hman tur lo thlan fel tawh EVM te chu tun thla ni 19-a vote thlakna atana hman theih turin buatsaih chhunzawm nghal a ni a. Hemi atan hian EVM siamtu ECIL Company atangin Engineer te rawn kalin anni hian EVM-a Data la awm te tirehin, Inthlanpui neih tur atana Candidate te hming leh an Symbol te belin a hman theih turin an buaipui nghal a. He hna hi ni thum chhunga zawhfel tura ruahman niin hei hi zawhfel a nih hunah venhimna hnuaiah dah lehin Polling Party ten an Duty-na tur hmun an pan dawnah lakchhuah a ni ang.