Serchhip District-ah Home Voting kalpui tan dawn

Tun thla ni 19-a Lok Sabha Inthlanpui neih tur atan Vawiin atang hian Serchhip District-ah kum upa leh Vohbik te chu an In lamah Vote thlak tir tan an ni dawn ta.
Election Commission of India in ruahmanna a siam angin Lok Sabha In-thlanpui neih turah hian AVSC (Senior Citizen, kum 85 chunglam) leh AVPD (Person with Disabilities, Vohbik) te chuan Postal Ballot hmangin an In lamah Vote an thlak leh thei dawn a, heng mite Vote thlak tir hna hi Vawiin hian kalpui tan tur niin tunkar Inrinni thleng khian he hna hi kalpui a ni dawn a ni.

Serchhip District-ah hian kum upa leh Vohbik Vote thlak turte buaipui tur hian Team 10 siam an ni a, Team tinah hian PRO pakhat leh PO pahnih zel dahin venhimna hna thawktute nen Vote thlak turte hi an In-ah kalchilhin Vote hi thlak tir an ni dawn a. Serchhip Bial-ah AVSC 80 leh AVPD 25, Tuikum Bial-ah AVSC 29 leh AVPD 11 bakah Hrangturzo Bial-ah AVSC 26 leh AVPD 5 awmin Serchhip District pumah AVSC 135 leh AVPD 41 an awm a. Heng bakah hian Essential Service-a puan, Election duty-a ruat ni lo leh Vote thlak ni-a an Office/hna-a Duty tura hotute’n an ruat leh Polling Station-a Vote thlak thei lo tur, Absentee Voters in Essential Service (AVES) tan pawh Postal ballot hmang hian Vote thlak theih niin Serchhip District-ah mi 11 in Vote an thlak dawn bawk a ni.