Nikum chhungin Serchhip District-ah Malaria pai mi 47 hmuhchhuah niin mi pakhat in a thihpui

Kum kalta 2023 chhung khan Serchhip District-ah Malaria hrik pai mi 47 hmuhchhuah niin Malaria vanga thi mi pakhat a awm a. Kum hmasa 2022 aiin nikum chhung khan Serchhip District-ah hian thisen enfiah tlem zawk mah se Malaria hrik pai hmuhchhuah erawh an tam zawk a ni.

Nimin khan Serchhip CMO Conference Hall-ah District Task Force on Malaria Elimination thutkhawm neiin kum kalta chhunga Serchhip District chhunga Malaria dona kawnga hmalakna hrang hrang leh Malaria dinhmun te thlirho a ni a, he huna tarlan a nih danin kum kalta 2023 chhung khan Serchhip District-ah mi 26,913 te thisen enfiah niin heng atang hian Malaria pai mi 47 hmuhchhuah an ni a, an zinga mi 19 te chu Malaria PF niin midang 28 te chu Malaria PV an ni thung a. Malaria vanga boral mi pakhat awmin July thla a thi kha a ni. Kum hamsa (2022) nena khaikhinin nikum khan thisen enfiah hi tam zawkin nikum hmasa khan mi 28,918 te thisen enfiah atangin Malaria pai mi 26 hmuchhuah an ni thung a, Malaria vanga thi erawh kum 2022 leh 2023-ah mi pakhat ve ve an awm a ni.


Nikum 2023 chhung vek khan Serchhip District-ah hian Dengue vei nia rinhlelh mi 175 awmin heng te hi an vaiin an Sample enfiah vek an nih hnuah Dengue vei mi 20 hmuhchhuah an awm a, he natna vei mi pakhat chu a boral bawk a. Kum hmasa 2022 aiin nikum khan Dengue vei hi an tlem zawk a, kum 2022 khan Serchhip District-ah mi 139 te Sample enfiah niin heng atang hian Dengue vei mi 24 hmuhchhuah an ni.

Malaria dona kawnga hmalakna hrang hrang he hunah hian tarlan niin damdawi hmanga DDT kah chu Malaria tamna bikah kalpui mek a nih thu leh Damdawi hmanga chiah sa Thosilen, Long Lasting Insecticidal Nets (LLIN) pawh kumin hian semchhuah leh mek a nih thu tarlan niin, damdawi hmanga Thoseilen chiah hna pawh kalpui chunzawm zel a nih thu tarlan a ni a. Hei bakah hian Malaria vei hmuhchhuah leh enkawl hma chu a pawimawh avangin khaw tinah Malria vei enfiahna leh Malaria damdawi te pawh dah vek a nih thu tarlan a ni a. Malaria natna chungchang inzirtirna chu kawng hrang hranga kalpui mek a nih thu leh ramriak mi te chu an Lo-ah te kalchilh an nih thu tarlan a ni a, Serchhip District chhunga Malaria vei hmuhchhuah zinga a tam ber te chu ramriak mi an nih thu pawh tarlan a ni bawk.

Nimin-a thutkhawm hi District Task Force on Malaria Elimination-a Co-Chairman leh Sr. Chief Medical Officer Dr. LP. Malsawma chuan a kaihruai a, District Vector Borne Disease Control Programme (DVBDCP)-a Consultant Lalchhuanawmi Khiangte chuan Malaria dona kawnga an hmalakna leh Serchhip dinhmun te tarlangin, sawihona neih zui a ni a. Deputy Chief Medical Officer Dr. Lallawmkimi Chhakchhuak chuan lawmthu sawiin hun a khar a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar