INC Candidate in Serchhip District a rawn tlawh

Lok Sabha Inthlanpui neih tura Indian National Congress (INC) Candidate Lalbiakzama chuan nimin khan Serchhip District rawn tlawhin Serchhip leh Khawlailung khuaa Street Campaign-ah te thu a sawi.

INC Candidate Lalbiakzama chuan, BJP Sawrkar hnuaiah India ram chu a chhe chak tawh hle nia sawiin, Press Freedom Index, khawvel ram hrang hrang 180 chuang zinga chanchinbu mite, Journalist-te zalenna tehnaah India ram chu 161-na kan ni me tih a sawi a. “Chanchinbu mite zahawmna leh an zalenna hi a tlahniam chak hle a. Hei hian India ram Democracy chu a tlahniam chak hle a ni tih a lantir a. Khawvela eirukna lian ber Electoral Scam-ah Central BJP sawrkar chu a hmingchhe hle a ni,” a ti bawk.

Lalbiakzama chuan a Candidate pui, ZPM leh MNF Candidate te chu a mihring tak pawhin an sual a ring lo tih sawiin, mi tha tak an ni ang tih pawh a rin thu a sawi a. Nimahsela, BJP thawhpuia, BJP lama ban phar tur an nih miau avangin Mizo mipuite’n kan vote thlakna tur chu uluk taka ngaihtuah a, eng Party Candidate nge vote ila kan ram, kan hnam, kan Sakhua a him theih ang, tih rilru pu chunga vote thlak turin Zoram mipuite a chah a. BJP ten kan ram leh Sakhua an sawpchhiat vek hmaa tangrual a, BJP Sawrkarna thlak ngei tura theihtawp chhuah a hmalakpui tur leh Kristian tana MP Candidate-a ding a ni tih hriat saka amah vote turin Zoram mipuite a sawm bawk a ni.

INC Candidate hi MPCC President Lal Thanzara leh an party hruaitu thenkhat ten an rawn tawiawm bawk a ni.