Lenkawl

Serchhip-a Excise & Narcotics Department chuan nikum chhung khan Zu leh ruihhlo tam tham tak an man.

Bangladesh ramchhung buaina avanga Mizoram-a Zohnahthlak raltlan rawn lut tur ramri-ah dan an nih avanga heng raltlan ten harsatna an tawh leh an tawrhna hriatpui nana Central YMA hmalakna a lungawi lohna lantir nana thutkhawm chu nimin khan Serchhip-ah pawh Serchhip Sub-Hqrs. YMA hmalakna in neih a ni.

Central YMA huaihawtin nimin khan Aizawl Raj Bhavan Gate bulah Bangladesh Zofa raltlan lo luh tumte thlavang hauhna atan mi sang tam tak an pungkhawm a, Central YMA President R. Lalngheta chuan raltlan te dinhmun sawiin, Political party hrang hrangte chu ram leh hnam aiawha ding an ni tih hria a, tun aia ram leh hnam chu ngaihsak turin a ngen bawk. He hunah hian MZP leh MSU President te pawhin thu an sawi bawk a ni.

Nimin khan Champhai-ah dan lova ramsa rep zawrh man te halral a ni a, heng ramsa an halral hi Dec. 14, 2022-a Champhai Venglai Bazar kawng sira zawrhte niin, Sanghal sa khai 10 leh Sakhi sa khai 4 a ni a, zuartu mi 2 te chu an thil tihsual avangin pawisa chawi tir an ni a, heng sa an zawrh te hi Myanmar Khawzim atanga an lakluh niin an sawi. Thubuai hi Court-in a chinfel tawh niin nimin khan Champhai DFO Office Complex-ah halral a ni.

Mizoram sawrkar hnuaia Mizoram Civil Service Officers (MCS), Mizoram Finance & Accounts Service (MF&AS) leh Mizoram Information Service (MIS) thar te tana ATI-in Foundation Training a buatsaih chu nimin khan Aizawl-a ATI Auditorium-ah neih tan a ni a, he Training-ah hian MCS 20, MF&AS 8 leh MIS- 4, an vaiin mi 32 te an tel a, sawrkar hna an thawh tur atana an hriat tur pawimawh thil chi hrang hrangte mithiam hrang hrangin an zir-tir dawn a ni.

Indian Institute of Mass Communication (IIMC), North-Eastern Regional Campus buatsaih ni 5 awh tur ‘Short Term Course for Media Persons from Sikkim’ chu nimin khan Mizoram Lok Sabha MP C. Lalrosanga chuan Mizoram University Guest House Seminar Hall, Aizawl ah a hawng a, tun thla ni 13 thleng awh tur he hunah hian Sikkim sawrkar hnuaia Information & Public Relations Department Official 4 leh Journalist 16 an tel a. Hemi chhung hian Topic hrang hrang an zirho dawn bakah DIPR Officer te nen inkawmna an nei dawn bawk a ni.

Nimin khan Aizawl-a SCERT Auditorium-ah Person with Disabilities(PwD) zinga khawhmuh fiah lo leh Mit lama harsatna nei bakah Beng lama harsatna nei te mamawh chi hrang hrang semna hun hman niin he hun hi Social Welfare Minister Er. Lalrinawma chuan a hmanpui a, he hunah hian Mit lama harsatna nei mi 25 leh Beng lama harsatna nei mi 39 ten an mamawh khawl an dawng a ni. Nimin-a he hun hmanna ah hian Er. Lalrinawma chuan pianphunga rual-banlo (PwD) te chu sawrkarin a ngai pawimawh tih sawiin, “Taksa pian hmangah midangte kan pha kher lo a nih pawhin kan rilru put hmang a dik phawt chuan mi hlawhtling tak kan ni thei a ni,” a ti bawk.

Health Minister Dr. R. Lalthangliana chuan Zirtawpni khan AHF International & Corporate Office leh AHF Office te tlawhin an hotu pawimawh te Meeting a neihpui.

Kum kalta (2022) chhung khan Mizoram Police-te’n Heroin kg. 49 leh gram 367 zet manin hei hi International Market-a hralhna anga chhutin Rs. 246,83,50,000/- hu zet a ni.

UD&PA Department changtu Deputy Chief Minister Tawnluia chuan nimin khan New Delhi-ah UD&PA Department hmalakna hrang hrang leh hmachhawp te a bawhzui.

Land Revenue & Settlement Department changtu Minister Lalruatkima chuan he Department-a thawktute chu intuaihriam leh theuh a tan la zel turin a chah.

Bangladesh atanga Mizo hnahthlak lo lut turte luhtir phal an nih loh chungchangah Central YMA chuan nimin khan Union Home Secretary hnenah Memorandum an thehlut.

Bangladesh atanga sahimna zawnga Mi-zoram-a raltlan rawn luh tum zingah rawn lut thei lova BSF ten an nawr kir (push back) chu mi 932 an tling tawh.

Mizoram-ah kum 1999 atanga Green Mizoram Day hman a nih hnuah nikum (2022) thlengin thingtiak 17,26,321 phun a ni tawh a. Green Mizoram Day-a thing phun te hi EF&CC thawktu ten an enkawl zui thin a ni.

Serchhip (Mualvawm)-a Slaughter House sak leh hawn tawh, hman zui loha awm mek leh a chhehvel te chu Serchhip-a AH&Vety Department-a thawktute chuan Zirtawpni khan thenfai hnatlang an nei.

January ni 3,2023 atanga chin hriat loha bo T.Amosa (40) h/o Ramdinsangi chu Inrinni chhun khan 4th IR Camp thlang (Luangpawl Road hlui, Excise Department huan bulah) thi in hmuh a ni a. Amah hi 4th IR Battalion-a awm niin a ruang hi Mamit damdawi In-a postmortem a nih hnuah Inrinni zan khan a nupui pa, Thanghnuna In, New Serchhip rawn thlenpui a ni a, nimin khan vuiliam a ni.

Mizoram-a Political party lian pathum te chuan Vawiin atang hian Aizawl-a an Office te hawng tanin kumthar atana inhlanna hun an hmang dawn a, MNF in Mizo Hnam Run an hawnna hunah an President Zoramthanga chuan thu a sawi anga, ZPM Party Office hawnna ah ZPM Leader Lalduhoma leh hruaitu dang ten thu sawiin Congress Bhavan hawnna ah MPCC President Lalsawta’n thu a sawi dawn bawk a ni.

Mizoram sawrkar hnuaia zirna In hrang hrangte chuan Krismas leh Kumthar vuakvet a chawlh an hman hnuah naktuk, January 10, 2023 hian kumin atan zirna In hawngin zirna kalpui tan leh a ni dawn.

Mizoram Election Department chuan Tripura a inbengbel tawh, Mizoram Electoral Roll a hming la chuang Bru vote neite hming 3,989 a paih tawh.

Salvation Army Serchhip Corps a thalai, Salvation Army Youth (SAY) te chuan Zirtawpni kalta khan Serchhip Blood Bank-a dah turin thisen Unit 12 an pe a, thisen petute hi mipa 9 leh hmeichhia 2 niin Serchhip Blood Bank-ah kalin thisen hi an pe a ni. Inrinni thleng khan Serchhip Blood Bank-ah hian thisen dah-khawl sa Unit 28 a awm a ni.