Serchhip-a Sa talhna hmun thenfai hna thawk

Serchhip (Mualvawm)-a Slaughter House sak leh hawn tawh, hman zui loha awm mek leh a chhehvel te chu Serchhip-a AH&Vety Department-a thawktute chuan Zirtawpni khan thenfai hnatlang an nei.
Thudawn danin AH & Vety Department Minister thar Er. Lalrinawma chuan tunhnai khan he Department-a thawktu pawimawhte chu kawmin Mizoram-a Sa talhna hmun siam tawh te dinhmun hi sawiho a ni a, heng hmunhma te hi hmang tangkai tura harsatna awm leh a sutkian dan turte sawiho niin hemi bawhzuina atan hian Serchhip Mualvawm-a Sa talhna hmun hawn tawh, hman tangkai zui tak loh thenfai hna hi thawh a ni a, hei bakah hian Sa talhtute pawh AH & Vety Department hotute chuan an kawm tawh bawk a ni.

Serchhip-a Slaughter House hi Mizoram-ah Aizawl pawnlam-a a hmasa ber ni turin Sept. 27, 2013 khan khatihlaia Serchhip DC, Juhi Mukherjee chuan a hawng tawh a, cheng nuai 245.60 lai senga sak niin a ruala Bawng leh Vawk pakhat ve ve talh theihna tur a ni a, amaherawh chu hawn a nih hnu hian hman tangkai zui a ni ta meuh lo a, tunah hian a building te a chhiat tawh bakah khawl dah te pawh hmuh tur a awm mumal tawh lo a ni.