Bangladesh atanga Zohnahthlak Raltlante thlavang hauhna thutkhawm Serchhip-ah neih a ni

Bangladesh ramchhung buaina avanga Mizoram-a Zohnahthlak raltlan rawn lut tur ramri-ah dan an nih avanga heng raltlan ten harsatna an tawh leh an tawrhna hriatpui nana Central YMA hmalakna a lungawi lohna lantir nana thutkhawm chu nimin khan Serchhip-ah pawh Serchhip Sub-Hqrs. YMA hmalakna in neih a ni.

Serchhip IOC Veng, DC Office Peng-a Bangladesh-a Zohnahthlak Raltlante Thlavang hauhna thutkhawm ah hian Serchhip khawpui chhung hmun hrang hrang atangin mi za chuang zet pungkhawmin hemi puala innkhawm tawi neih ah Serchhip Sub-Hqrs. YMA President Kawlthuama chuan Myanmar-a Zohnahthlak ten hmanni lawkah harsatna an lo tawk tawh tih sawiin, raltlanin baihvai takin an rawn luh thu leh Mizoram mipui ten chhawmdawl hna kan lo thawh tawh thu a sawi a. Tun hunah Bangladesh lama kan unau ten harsatna an tawk leh mek tih sawiin, India sawrkar in raltlan anga tuamhlawm duh lovin BSF kaltlangin ramri-ah lo dan an nih thu leh tui leh chaw pawh nei mumal lova an awm thu a sawi a. Heng raltlan te thlavang hi YMA chuan a hauh tlat tih sawiin, mihring dikna leh chanvo humhalha heng mite thlavang hauh tur hian Serchhip Sub-Hqrs. YMA chu an phenah an ding tlat dawn tih a sawi a. Hun lo kal zel turah pawh harsatna leh manganna an tawk a nih chuan englai pawhin Serchhip mipuite leh YMA Member te chu an lamah an tang tlat dawn tih sawiin, harsatna leh manganna an tawh te hriaa lo tuamhlawma chhawmdawl tura inring reng turin mipuite chu a chah bakah tangtlang zel turin a sawm nghal bawk a ni.

Serchhip Sub-Hqrs, YMA Treasurer C. Lalrammuana kaihhruai he hunah hian Bangladesh Raltlan Relief Committee-a Fin. Secretary Lalpeklawma chuan Bangladesh-a Zohnahthlak te dinhmun leh harsatna an tawh te sawiin, Bangladesh-ah Zohnahthlak hnam paruk awm te sawrkar atanga hamthatna awm thei hrang hrang an dawn ve theih thin loh thu leh chumi nawr nan chuan kawng hrang hranga hma an lak thu leh Silai keng pawl, KNA te hial an din thu a sawi a. He an hmalakna nghawng zelah hian an mamawh lei kawngah te pawh harsatna tawkin Bangladesh sawrkarin Arakan Army te inremna siampuiin, KNA te beituah hmangin Bomb hmangte a beih an nih thu a sawi a. Mi tam tak man te an neih avangin tunah hian sahimna leh eitur te zawngin Mizoram lamah an rawn raltlan thu a sawi a, amaherawh chu ramri-ah BSF den an lo dan tak thu te pawh a sawi bawk a ni.

He hun hmanna ah hian Serchhip Sub-Hqrs. YMA Secretary PC. Vanlalluna chuan Bangladesh-a Zohnahthlak ten harsatna an lo tawh dan leh chhawmdawlna hna YMA in a lo thawh tawh te tarlangin, Mizoram sawrkarin Lawngtlai DC kaltlanga Rs. 30,42,000 a pek bâka tanpuina lut zingah Serchhip Sub-Hqrs. YMA in a pek Rs. 10,000/- a tel thu a sawi a ni.

Nimin-a he hun hmanna ah hian Rev. VL. Nithanga chuan hunserh hmangin Mizo-ram chu Mizote tana Jerusalem ni turin buatsaih a nih thu leh he ram leh a mihring te hi kan inzawm tlat thu a sawi a, Mizo kan nihna hi eirukna in emaw, Sap nun dan zira, hnamdang te tih dan Copy-in emaw kan hralh tur a ni lo, a ti bawk.

He huna tel te hian Bangladesh atanga Mizo hnahthlak, himna zawnga Mizorama rawn luh tum te BSF in ramria an lo dang chu an dem takzet thu te, Ramri-a tangkhang mek Zo hnahthlak unau te hi rang taka Mizoram-a an luh phalsak an duh thu leh Mizoram-a an rawn luh hunah pawh India sawrkar in a tul angin chhawmdawlna pe ngei bawk se an duh thu Resolution siamin an pass bawk a ni.