Raltlan 932 nawrlet tawh

Bangladesh atanga sahimna zawnga Mi-zoram-a raltlan rawn luh tum zingah rawn lut thei lova BSF ten an nawr kir (push back) chu mi 932 an tling tawh.

Bangladesh Zohnahthlakte Thlavang Hauh punkhawm nimin-a Aizawl-a buatsaih ah Central YMA General Secretary Prof. Lalnuntluanga chuan Report pe-a he thu hi tarlangin, November ni 20, 2022 ah Bangladesh atanga sahimna zawnga rawn tlan kan unauten tlai dar 4 :47-ah Parva-III an rawn thlen thu leh November ni 21-ah mi 274 ten Parva-III rawn lut lehin, chung kan unau lut hote chu BSF ten lo la khawmin, hmun chep tak, hmun pakhatah khungkhawm an nih thu a sawi a. Hemi hnu November ni 25-ah midang 21 rawn lut lehin, December ni 7-ah mi 15 ramri kanin Mizoram chhungah an rawn lut leh bawk tih a sawi.

Central YMA General Secretary in a sawi danin December ni 12, 2022-ah mi 274 lo lutte chu khaw hrang hrangah semdarh an ni a, chhungkaw 10, member 46 te Mautlang khua ah dah an ni a, chhungkaw 14, member 42 te Chamdur Project khua ah dahin, chhungkaw 20, member 66 te Vathuampui khua ah dah an ni a, Parva-III ah chhungkaw 29, member 149 te an awm zui a ni.

Hemi hnu hian mi 600-800 inkar vel raltlan ramhnuaiah an awm mek tih report an dawn thu leh December ni 28-29 ah emaw Mizo-ram rawn lut thei tura ngaih an ni tih pawh sawiin, “Chung kan unau, an sahimna atana rawn tlan te chu ramri-ah ramri vengtuten India ram lolut tawh te pawh nawrlet lehin, harsatna nasa tak an lo tawk ta a ni,” a ti a. “An Jerusalem an rawn luh tawh hnuah pawh nawrkir an ni a, a lungchhiat thlak kan ti hle a ni,” a ti bawk.