Tripura-a inbengbel tawh mi 3989 te hming Mizoram Electoral Roll atanga paih a ni tawh

Mizoram Election Department chuan Tripura a inbengbel tawh, Mizoram Electoral Roll a hming la chuang Bru vote neite hming 3,989 a paih tawh.

Joint Chief Electoral Officer David Liansanglura Pachuau sawi danin Tripura State Election Commission atanga ERONet kaltlanga Bru vote nei mi 3,610- te hming lo paih tura hriattirna an dawn tawh atangin vote nei hming 3,599 chu paih a ni tawh a, heng bakah hian Tripura State Election Commission-in an State Electoral Roll a an lo thun tawh mi 390 te hming chu paih a ni tawh bawk a ni. Thudawn danin tun thlengin Mamit District-a Hachhek, Mamit leh Dampa Assembly Bial chhunga Bru vote nei hming chuang hi paih turin Tripura lam hian mi 3,099 hming an rawn thawn a, an zinga hming 3,088 chu paih a ni tawh a. Harsatna engemaw a awm avangin mi 11 hming hi la paih a la ni lo thung a. Heti chung hian Tripura a inbengbel tawh Bru zinga Mizorama vote nei, an hming la paih loh hi mi 7,651 an la awm a. Hei hi a chhan ber chu ERONet hmanga paih tur hming an rawn thawn muan vang leh State pahnihin Electoral Roll Special Summary Revision an kalpui laia hming thun leh paih an chawlhsan lailawk vang niin Joint CEO chuan a sawi a ni.

Tripura a inbengbel tawhte’n Mizoram a Vote an la neih na Kolasib leh Lunglei District-a Election Department hnathawkte chuan an hming paih tura ngenna an dawn apiang an paih kim vek tawh a. Kolasib District-ah hian Tuirial, Serlui leh Kolasib Assembly bial-ah Bru vote nei an la awm a, Lunglei District-ah pawh Lunglei South, Thorang leh West Tuipui Assembly Bial-ah te an la awm bawk a ni. 

Kum 1997 October ni 21-a Dampa Tiger Reserve a Bru hel pawl te’n Forest Guard Lalzawmliana an kahhlum hlim chhawna Tripura lama a hlawma pem thla ta Bru hote Electoral Roll-a an hming a la chuan zui zel avang leh Mizoram inthlan apianga vote an la thlak zel avangin Election Commission of India leh Mizoram-a pawl hrang hrangte inkarah inepna boruak a awm reng a. Kum 2020 kum bul khan inremna siamin Tripura-a awm zui turte chu Mizoram Elecoral Roll atanga paih tura tih an ni ta a ni.