Kum kalta-ah Police ten Heroin man tam

Kum kalta (2022) chhung khan Mizoram Police-te’n Heroin kg. 49 leh gram 367 zet manin hei hi International Market-a hralhna anga chhutin Rs. 246,83,50,000/- hu zet a ni.

IGP Headquarters John Neihlaia sawi danin nikum chhunga Heroin an man hi kum hmasa nasa takin aa tam zawk a, Heroin bakah hian Methamphetamine pawh kg. 217 leh gram 295 manin hei hi International Market-ah chuan Rs. 651,88,50,000.- hu a ni a. Khuh damdawi, thalaite’n an hmansual lar tak Codein pawh bur 718 manin Ganja kg. 129 leh gram 825 bakah Methamphetamine siamna hmanrua atana dan kalha India ram atanga Myanmar a tawlh chhoh thin pawh kg. 29 leh gram 80 an man bawk. Mizoram Police-in nikum chhunga an ruihhlo man zawng zawng hi International Market-a a a hlut zawng chu cheng vbc. 898.92 chuang hu a ni a, ruihhlo an man kaihhnawihah hian mi 347 man an ni a, thubuai 248 ziahluh a ni bawk a ni.

Nikum chhung vek khan Mizoram Police-te hian Myanmar atanga dan kalha tawlh kuhva ro kg. 40 zel awmna ip leh satha ip kg 20 zel awmna ip 4,034 an man bawk a, an kuhva ro man zawng zawng hi cheng vbc. 4.63 chuang hu a ni a. Kuhva ro tawlh chungchangah hian mi 35 manin thubuai 7 ziahluh a ni bawk a. An kuhva ro mante leh mihring an mante hi Customs thuneitute hnenah an hlan hlawm a ni.