Deputy CM in UD&PA hmalakna a bawhzui

Zonuna Kawlni (LENKAWL) • January 10, 2023 • Comments • Mizoram

UD&PA Department changtu Deputy Chief Minister Tawnluia chuan nimin khan New Delhi-ah UD&PA Department hmalakna hrang hrang leh hmachhawp te a bawhzui.

Deputy Chief Minister hian Ministry of Housing and Urban Affairs Secretary Manoj Joshi chu kawmin Swachh Bharat Mission hnuaia Urban Town ten uluk zawka bawlhhlawh an sawngbawlna tur, Solid Waste Management Centre chungchang sawipuiin a hlawhtlin thuai theihnan hma lak ran a tul thu a sawi a, Special Assistance to States For Capital Expenditure Part 6 Urban Reforms hnuaia project pawimawh tak tak pathum atana UD&PA in proposal an thehluh pawh lo bawhzui turin a ngen a ni.

Deputy Chief Minister hian ADB Loan hmuh tur Aizawl Sustainable Urban Transport Project pawh chak taka hmalak a nih thu Secretary hi a hrilh a, project kalpui a nih hunah pawh Ministry puihna tam tak an mamawh tur thu a hrilh a ni. Manoj Joshi hian AMRUT, SBM (U), PMAY(HFA) leh Scheme dangah State chanpual tur Allocation awm sa chu tihkhawtlai awm lova release zel a nih tur thu a lo hrilh bawk.