Green Mizoram Day hman a nih atangin thingtiak 17,26,321 phun a ni tawh
Mizoram-ah kum 1999 atanga Green Mizoram Day hman a nih hnuah nikum (2022) thlengin thingtiak 17,26,321 phun a ni tawh a. Green Mizoram Day-a thing phun te hi EF&CC thawktu ten an enkawl zui thin a ni.
Zalen-in RTI hmanga zawhna siam, Environment, Forest & Climate Change Department (EF&CC) SPIO-in a chhan danin kum 1998-ah ‘Green Aizawl Programme’ hman a ni a, a kum leh 1999 atangin Green Mizoram Day hi hman a ni a, kum 2013 thlengin June thla ni remchangah hman thin niin, kum 2014 atangin June 11-ah Green Mizoram Day hi hman thin a ni. Kum 1999 attanga nikum thlenga Green Mizoram Day-a thing phun tawh zawng zawng chu 17,26,321 niin, hemi hun chhung hian thing tiak 26,80,453 sem a ni bawk.Green Mizoram Day a thing phun te hi Environment Forest & Climate Change (EF&CC) thawktu ten an enkawl zui thin a, sam fai te, a hungna (fencing) te an siam that thin bakah thing phun tawh, lo thi emaw, nung tha lo deuhte chu thingtiak tharin an thlak thin bawk a. Thing tiak phunte hi hmun hrang hrangah a nun dan a inang lo a, chawhrualin zaa 60-90 nung anga ngaih a nih thu a tarlang bawk a ni. Green Mizoram Dat-a Thing tiak phun tam berte chu Hnahhlun, Hlingsi, Herhse, Thlado, Tlaizawng, Farte chi, April par, Ngiau, Chawmzil, Khuangthli, Sunhlu, Bung, Lenhmui, Lamkhuang, Theihai, Zuang, Tei, Chawmzil, Char, Kawrthingdeng, Makpazangkang te an ni.
SPIO tarlan danin Green Mizoram programme atan bik kumtin Forest Division tinah thing tiak lian (tall seedings) siamchhuah thin niin State pawn atanga chawkluh a ni ngai lo a. Heng thingtiak te hi kum 1-3 (a thing tiak species azirin) Nursery-a enkawl hnuah phun tura pekchhuah thin a ni a, chhunzawm zel tur a ni. Nikum 2022 Green Mizoram Day hmanna a Chief Minister Zoramthanga’n ‘thing t]iak lian sa phun nise’ tia rawtna a siam chungchangah SPIO chuan Chief Minister sawi chu tih hlawhtlin theih leh tihhlawhtlin mek a nih thu te, chumi atan chuan Department-in ruahmanna fel tak a neih thu te a tarlang bawk a ni.