Lenkawl

Serchhip District ‘Family Oriented SEDP’ - Zonuna Kawlni

Nikum (2021)-a Vawk hri, African Swine Fever (ASF) hri leng darh zel tur venna atana Serchhip District-a Vawk suat te hnenah sawrkar chuan zangnadawmna a pechhuak tan ta a, Serchhip District-ah hian Vawk suat 2970 neitu chhungkaw 747 te hnenah zangnadawmna hi Rs. 2,25,33,400/- pekchhuah tura ruahman a ni.

Govt. Serchhip College-a Drug Awareness Club leh Foundation for Drug-Free Mizoram tangkawp buatsaihin nimin khan Govt. Serchhip College zirlai naupangte tan 'Drug Awareness Campaign' neih a ni.

Rulhut avanga natna kan kai theih te tihbona tura Rulhut hlo pekna Ni, National De-Worming Day chu nimin khan ramchhung hmun hrang hrangah hman leh niin Serchhip-ah pawh he ni pual hian Govt. PCR H/S-ah hun hman a ni.

Serchhip District chhung khaw hrang hrang ah African Swine Fever (ASF) vanga Vawk thi in ziaawm lam pan tawh mah se nimin khan Khaw-lailung-ah ASF vanga Vawk thi pakhat a awm belh leh a, hmun dang ah Vawk thi leh suat a awm belh lo thung. Khawlailung-ah hian ASF vangin kumin ah Vawk 17 a thi tawh a, Vawk 166 suat a ni tawh bawk a ni.

Mizoram hmun hrang hranga eirawngbawlna Gas man tur bithliah thar a ni leh ta a, hemi ang hian Vairengte tihloh hmun dang zawngah kg. 14.2 a rit Domestic Cylinder bur khat man chu Rs. 1205/- a ni anga, Commercial Cylinder man chu Rs. 2315.50 a ni ang. Domestic Cylinder te hi Home delivery a hralh a nih chuan Rs.70/- zel belh tur a ni a, Godown-a hralh chuan Rs.29.26 zel paih thung tur niin Delivery Point a sem a nih chuan Rs.7.53 zel belh tur a ni ang.

Nimin khan Serchhip District-ah COVID-19 hri kai mi 5 hmuh belh niin hri kai enkawl dam erawh an awm belh lo thung.

Chief Minister Zoramthanga chuan nimin khan Mizoram DGP Devesh Chandra Srivastava leh a thawhpuite chu a Pisa-ah kawmin an hnathawh that avanga World Book of Records-ah an lang chu a lawmpuina thu a hrilh a. Mizoram Police hi 'World Book of Records' Gold Edition pahnihna ah telh an ni a, hei hi kumin June 24-a ruihhlo halral runpuia ruihhlo kg 930.229, International Market rate-a Rs. 23,62,09,40,245/- hu halral kha vawikhata ruihhlo tihralna lian ber a nih bakah nungcha tawlhruk manna lian tham ber, nungcha 468 zet manna avangte a ni.

MNF President Zoramthanga chuan nimin khan Aizawl Mizo Hnam Run-a MNF Chhung Inkhawm-ah kumin chhhung ngeiin SEDP 1st installment Rs. 25,000/- leh 2nd installment Rs. 25,000/- theuhin an sem dawn tih a sawi a, “SEDP hi khawi atanga sum puk emawa sem kan ni lo a, kan budget atang ngeia sem kan ni,” a ti. MNF President chuan, “Tun Financial Year chhung hian chhungkaw 60,000 hnenah Rs. 50,000/- theuh pek an ni dawn a. Financial year tharah Rs. 50,000 lo dawng tawhte pek belh an an ni anga, chumi piah lamah chuan dawng thar tur sing tel kan pek belh leh dawn bawk a ni,” a ti bawk.

MZP General Hqrs. chuan kum 2015 atanga kumtin Sept. 2-a ‘Mizo zirlaite tan hnamdang Nupui/Pasal nei lo tura inzirtirna Ni’ an hman thin chu nimin khan Aizawl-ah hmang lehin zirna In hrang hrangah an pawl hruaitute insemdarhin Mizo zirlaite tan hnamdang nupui/pasal nei lo tura inzirtirna hun hman a ni.

Nimin khan Guwahati-ah hmarchhak bial MP te leh North Frontier Railway hotute thutkhawm neiin he hunah hian Mizoram Lok Sabha MP C. Lalrosanga chuan Bairabi leh Sairang inkar Rel kawng siam mek bakah Sairang atanga Mizoram chhim lam thleng Rel kawng siam turin Railway thuneitute chu a ngen a. December 2023-a zawh hman tum KM 51 vela thui Bairabi-Sairang Rel kawng piah lamah Lawngtlai District a Hmawng-buchhuah thleng Rel kawng siam tumna ti hlawhtling ngei turin Railway hotute chu a ngen a ni. NF Railways General Manager Anshul Gupta chuan Hmawngbuchhuah thlenga Rel kawng siam tum hi tih tlang tum a ni tih sawiin, Bairabi-Sairang Rel kawng siam mek atan hian cheng vbc. 6527 ruahman a ni tih a sawi bawk.

Nimin khan Health Minister Dr R. Lalthang-liana hovin a Pisa-ah SELCO Foundation CEO Harish Handa, NABARD Mizoram General Manager Prasada Rao leh H&FW hotulu ten ni zung chakna (Solar Energy) hmanga Mizoram chhunga damdawi In te chawm dan tur an sawiho a. Health Department leh SELCO Foundation tangkawp hian Mizoram sawrkar hnuaia Health facility (damdawi In leh khawl) zawng zawng Solar Energy hmanga chawm turin hmalak mek a ni a. Tunah hian SELCO Foundation fund atangin Health Centre 40-ah Pilot Phase bultan tum mek niin, Mizoram chhunga damdawi In zawng zawng ah hmalak tum a ni a. SELCO Technical Team chuan heng Centre 40 te'n Energy an mamawh dan tur assestment an ti zo tawh a ni.

Lawngtlai District chhimlam, Laitlang piah, Myanmar ramchhunga Myanmar Sipai leh Arakan Army te inkahna vanga an sahimna zawnga Lawng-tlai District a rawn tlanlut chu mi 564 an tling tawh a, Laitlang-ah 172 Dumzautlang-ah 90 Hmawngbuchhuah-ah 200 leh Zochachhuah-ah 102 an awm mek a, heng mite hi nimin khan Central YLA chuan chhawmdawlna an hlan a ni.

Nimin tlai thlengin Mizoram-ah COVID-19 hri kai enkawllai mi 464 an awm.

Deputy Chief Minister Tawnluia hovin nimin khan Chief Secretary Conference Hall-ah Mizo-ram-a lui te humhalh nana Dan siam leh duan tur chungchang, ‘The Draft Mizoram Protection Bill’ sawikhawm a ni.

Chaw tha leh hrisel ei inzirtir uar thla, Poshan Maah (Nutrition Month) 2022 chu nimin atang khan hman tan leh niin District hrang hrangah a hawnna neih a ni a, Serchhip-ah pawh Poshan Maah hawnna hi neih a nih bakah Serchhip District chhunga East Lungdar ICDS Project pawhin hun an hmang bawk a ni.

Tun thla ni 6-a Baktawng VC (Reserved Seat) by-election neih tur atana inbuatsaihna chu tluang taka neih mek zel a ni a, he inthlanna a hman tur Ballot Paper te niminpiah-a chhut a nih hnuah nimin khan he inthlan buaipuitu tur Returning Officer, Polling Officials leh Counting Officials te tan nimin khan DC Meeting Hall-ah inthlan buaipui dan zirhona neih a ni a, he hunah hian hian Election Officer Lalrinchhani Ralte leh District Level Master Trainer F. Lalnisai SDC ten zirtirna an pe a ni.

Serchhip District Treasury Office-a thawktute chuan sawrkar hnathawk nghet te hlawh pekchhuah hun tur hriat la ni lo mah se pekchhuak thei turin an inring reng tih an sawi.

Serchhip District-a Police te tan an hnathawh dan chungchanga intuaitharna atana ni 2 awh training chu nimin khan Serchhip-ah neih tan a ni.

Serchhip Thalai Pawl (STP) ten Serchhip khawpui chhunga High School leh Higher Secondary School hrang hranga ruihhlo thatloh zia inzirtirna an neih kal mekah nimin khan Govt. H/S Chhiahtlang-ah inzirtirna neih chhunzawm leh a ni a, he hunah hian STP hruaitu ten zirlai naupangte hnenah ruihhlo thatloh zia leh ruihhlo laka inthiarfihlim a pawimawh zia te sawiin, heng ruihhlo laka fihlim tur hian tih chhin loh chu thil pawimawh hmasa a nih thu te an sawi a ni. STP in he hmalakna an kalpui mekah hmabak zirna In pakhat an la nei a ni.