Serchhip-ah NDD hman a ni

Rulhut avanga natna kan kai theih te tihbona tura Rulhut hlo pekna Ni, National De-Worming Day chu nimin khan ramchhung hmun hrang hrangah hman leh niin Serchhip-ah pawh he ni pual hian Govt. PCR H/S-ah hun hman a ni.
National De-Worming Day puala hun hman hi he School Principal K. Zoramchhani chuan kai-hruaiin Serchhip CMO Office atangin Dr. Samuela bakah Deborah Vanlalchhuangi, District Prog-ramme Manager (NHM) leh Lianthangpuii Fanai, DEIC Manager te chuan hun an hmanpui a, he hunah hian Dr. Samuela chuan he ni hman chhan leh Rulhut in kan taksa tana harsatna hrang hrang a siam theih te a sawi a, heng Rulhut in kan taksa-a harsatna a thlen theih te laka kan him theihna turin Rulhut hlo ei chu kan ngaih pawimawh a tul thu sawiin, he huna tel zirlai naupang 68 te hnenah hian Rulhut hlo pek nghal a ni bawk.

Nimin-a he hun hman hi Serchhip ICDS Project-a CDPO Caryll Lalpari pawhin a hmanpui a, tun tumah hian Serchhip District-a kum 1 leh 19 inkar mi 22,730 vel te hnenah Rulhut hlo pek tum a ni dawn a ni.

Naupang leh zirlai zawng zawngte Rulhut laka an lo fihlim theih nan National Deworming Day (NDD) hi India ramah kum 2015 khan State/UT 11-ah bultan a ni a, a hlawkna te hmuh a nih hnuin India ram pumah February 2016 atang khan hman chhunzawm a lo ni ta a ni. He hmalakna hi Rulhut pai vanga natna hrang hrang thleng theite, thisen tlakchhamna te leh naupang than thu um bona tura ruahman a ni a, kum 1 – 19 inkarte tan kum tin vawihnih (2) rampum huapin a ruala rulhut-hlo (Albendazole) eitirna hun hi kalpui thin a ni a. Mizoram-ah pawh February 2016-ah khan hman tan niin, round hnuhnung ber, April 2022-ah khan naupang sikul kal leh kal lo 96% in he damdawi hi an ei a, nimin-a ei ve thei lo emaw, ei hman lo te pawhin an ei ve theuh theih nan September ni 9, 2022 ah hian Mop Up Day neih leh a ni ang.

Comments

Popular News (Last 30 Days)

Serchhip DCSO sawn a ni