Mizoram-a lui humhalhna tur Dan duan sawihona nei

Deputy Chief Minister Tawnluia hovin nimin khan Chief Secretary Conference Hall-ah Mizo-ram-a lui te humhalh nana Dan siam leh duan tur chungchang, ‘The Draft Mizoram Protection Bill’ sawikhawm a ni.

He thutkhawm ah hian Agriculture Minister C. Lalrinsanga, Fisheries Minister K. Lalrinliana leh Land Revenue Minister Lalruatkima te bakah Chief Secretary Dr. Renu Sharma leh Planning & Programme Implementation Department; PHE Department; Irrigation & Water Resources, Law & Judicial Department-a Secretary-te, Central YMA, FLAM leh Mizoram State Pollution Control Board aiawhte an tel a ni.

He thutkhawm a tel te hian Mizoram a lui te humhalh kawnga thil pawimawh leh tul nia an hriat te an sawiho a. Lui bakah leiverh-a a tui lakchhuah mekte humhalh leh khuahkhirh pawh he dan siam tur hian huam se tih te, Mizoram a lui te hi a zau thei ang ber huam se tih te sawilan a ni a. He dan ruangam duangchhuak turin Sub Committee din relin Chairman turin Agriculture Minister C. Lalrinsanga an ruat a, Member Secretary ah PHE Secretary chu ruat a ni bawk a. Anni bakah hian Member dangte pawh ruat an ni a. Sub-Committee chuan PHE Department leh Environment, Forest & Climate Change Department ten lui humhalh nana dan an duan chin te chu enmil se tiin an rawt bawk a ni.