Nikum-a ASF vanga Vawk suat chhungkua 747 te hnenah zangnadawmna pekchhuah mek a ni
Vawk natna hri leng African Swine Fever (ASF) avang hian nikum khan Serchhip District chhungah Vawk thi engemaw zat a awm bakah hri leng darh zel tur venna atan Vawk damlai engemaw zat suat a ni bawk a, heng Vawk suat neitute tan hian Mizoram sawrkar chuan Sawrkar laipui ah zangnadawmna dil sakin State sawrkar nan tangtlangin zangnadawmna hi pek a ni a, hemi ang hian Serchhip District-ah pawh zangnadawmna hi Vawk suat neitute hnenah hian an Bank Account kaltlangin pekchhuah mek a ni. Serchhip District AH & Vety Officer Dr. R. Lalmakthanga chuan nikum a Vawk suat te hi Office lama report lut ang ang te chu uluk taka chhinchhiah a ni tih sawiin, heng te hi Aizawl lamah thawnthlak vek niin an list thehluh mil hian zangnadawmna hi an rawn pe nia an ngaih thu leh Aizawl lamah hian tihsual palh erawh a awm theih thu a sawi a. Hri vanga Vawk thi te chu zangnadawmna hian a huam loh thu leh hri leng darh tur venna atana suat te chauh a huam thu a sawi a ni.
Serchhip District-ah hian Vawk suat 2970 neitute chhungkaw 747 te hnenah zangnadawmna hi Rs. 2,25,33,400/- pek tura ruahman niin an zinga mi 3 te erawh chu Bank Account tihfel loh a awm avangin tunah hian pek an la ni lo thung a, Serchhip DVO chuan kumin hian ASF avangin Vawk engemaw zat suat leh a nih thu sawiin, heng te hi pawh zangnadawmna pek leh theih a nih beiseiin uluk taka chhinchhiah zel a ni tih a sawi a. Vawk suat te hi ni tin report zel a nih thu leh Certificate pawh pek zel an nih avangin a hnu lamah tih danglam leh mai theih a nih loh thu a sawi bawk.
Serchhip District-a ASF avanga Vawk suat tam ber chu PIGFED Thenzawl niin anni hian Vawk 248 suatin zangnadawmna pawh Rs. 14,84,400/- an dawng dawn a, Lalhriatrenga (Hriang-tlang) chuan Vawk 74 suatin Vanlalrochhara (Chhingchhip Mualpui) chuan Vawk 49 a suat bakah Zothanvawra (Chanmari Veng) chuan Vawk 38 suat bawkin anni hi Vawk suat tam zual te an ni a. Zangnadawmna pek hi Vawk len dan a zira danglamin Vawk pakhat zelah kg. 15 hnuailam ah Rs. 2200/-; kg. 15-40 ah Rs. 5800/-; kg. 40-70 ah Rs. 8400/-; kg. 70-100 ah Rs. 12,000/- leh kg. 100 chunglam ah Rs. 15,000/- te a ni a. Hei bakah hian Vawk chaw tihchhiat sak te kg. khat zelah Rs. 22/- hisapin zangnadawmna pek an ni bawk.
Comments
Post a Comment