Ruihhlo tel lo nun duhawm zawk tih hmangin Serchhip-ah ruihhlo thatloh zia inzirtirna neih a ni

Govt. Serchhip College-a Drug Awareness Club leh Foundation for Drug-Free Mizoram tangkawp buatsaihin nimin khan Govt. Serchhip College zirlai naupangte tan 'Drug Awareness Campaign' neih a ni.

'Ruihhlo tello nun duhawm zawk' tih thupui hmanga HD Rosanga Multipurpose Hall-a he hun hman hi Serchhip Addl. DC Lalmuansanga Ralte chuan khuallian nia hmanpuiin Mihringte chu mak leh ropui taka siam kan ni tih sawiin, Pathian in min siam danah thil tih theihna pek kan nih thu leh awm awl-a rui chhe mai mai tur ni lovin Pathian min siam chhan kan haichhuah a tul thu a sawi a. A bik takin kan ram-a hmeichhia te hmasawnna chu lawmawm a tih thu sawiin, hetih rual hian Mipa thalaite thanna erawh a muang deuh em tih ngaihtuah a tul thu a sawi. Addl. DC chuan thalaite chu kan Pathian thu pawhin kan thatlai chen min phalsak tih pawh sawiin, amaherawh chu kan chungah Pathian in ro a rel dawn tih kan hriat a pawimawh thu leh kan nun ah mawh kan phur a ni tih kan hriat a tul thu a sawi a. Kan ram-a ruihhlo hmansual lanchhuahna chu a ler a ni tawh nia sawiin, chhungkua atanga bul kan tan that a tul thu a sawi bawk.

He huna khual zahawm MJA Serchip District President C. Lalhminghlua pawhin ruihhlo hmansualna in kan ram a run mekna chu theihtawp-a beihlet a tul thu sawiin, sawrkar leh tlawmngai pawl bakah Kohhran ten ruihhlo do hna kan thawk chung pawhin kan hneh thei meuh rih lo nia a lan thu a sawi a. Pathian thu leh tawngtaina nen theihtawp chhuah a ngai tih a sawi bawk.

Nimin-a he hun hman hi FFDFM-a Asst. Secretary Freddy Lalhriatmawia chuan kaihruaiin NB Sachei, Chairman Drug Awareness Club Govt. Serchhip College in inlawmna thu a sawi a, FFDFM Founder V. Lalnunthara chuan April 1, 2019-ah he Foundation hi din a ni tih sawiin,kan ram ah ruihhlo vanga enkawl ngai an tam thu leh Home-a enkawl ngai ringawt pawh tam tham tak an awm thu a sawi a, ruihhlo dona atan sum tam tak sen a ni chungin a hlawhtlinna erawh a sang lo hle nia sawiin, hei vang hian ruihhlo la ti ve lo te venhim an nih theihna tur leh nun thar leh duhawm an neih theihna turin hma an lak thu a sawi bawk a ni. He hunah hian Govt. Serchhip College Principal K. Laldinpuii pawhin thu a sawi bakah mithiam te atangin ruihhlo that loh zia inzirtirna neiin ruihhlo ti chhin lo tura intiamna neih a ni bawk.