Serchhip District Police ten ni 2 awh training nei

Serchhip District-a Police te tan an hnathawh dan chungchanga intuaitharna atana ni 2 awh training chu nimin khan Serchhip-ah neih tan a ni.
Serchhip SP Conference Hall-a he training hawnna hi Serchhip SP Stephen Lalrinawma chuan hmanpuiin Police te chu pawikhawihtu ten Dan anga hremna an hmuh theihna tura thawktu an nih thu leh hei vang hian Dan an hriat a pawimawh thu a sawi a. Hemi atan hian Quarter tin Training hi nei tura beisei an nih avanga training hi buatsaih leh an nih thu leh kumin April thla khan quarter hmasa ber atan training hi neih tawh a nih thu a sawi bawk.

He training hawnna hun hi Serchhip Addl. SP Saidingliana chuan kaihruaiin a hawnna neih zawh a nih hnu hian Resource Person te atangin thupui thlanbik hrang hrang hmangin inzirtirna neih nghal a ni a, SI C. Lalremthanga OC Serchhip PS, SI Melody Lalmuanpuii Reader SDPO, Lalhmingthanga APP Distric Court Serchhip leh ASI Vanlallawma Incharge DSB te atangin ND&PS Case chungchanga hriat tur pawimawh te, naupang leh Hmeichhia te laka pawikhawihna thleng thin chhui dan te, thubuai ziahluh leh bawhzui zelna atana hriat tur pawi-mawh leh Office kalphung atana pawimawh te zirho a ni a, he training ah hian Serchhip District chhung Police Station hrang hrang atangin mi 23 telin Vawiin-ah chhunzawma zawhfel a ni ang.