Serchhip District-ah Chaw tha leh hrisel ei inzirtir uar thla, Poshan Maah (Nutrition Month) hman tan a ni

Chaw tha leh hrisel ei inzirtir uar thla, Poshan Maah (Nutrition Month) 2022 chu nimin atang khan hman tan leh niin District hrang hrangah a hawnna neih a ni a, Serchhip-ah pawh Poshan Maah hawnna hi neih a nih bakah Serchhip District chhunga East Lungdar ICDS Project pawhin hun an hmang bawk a ni.

Serchhip ICDS Project Office, Serchhip P&E Veng-a Poshan Maah (Nutrition Month) hawnna hun hi Serchhip ICDS Project-a CDPO Caryll Lalpari chuan kaihruaiin khuallian nia he hun hmanpuitu Serchhip BDO Lalrinchhani Ralte chuan rampum-a hetiang hun hman a nih chhan te sawiin, Serchhip District chhungah pawh uar tak leh hlawk taka hman a nih ngei a beisei thu a sawi a. Poshan Maah hman chhunga mipuite inzirtirna kalpui dan tura ruahmanna an siam hrang hrangte pawh hlawhtling taka a hlawhtlin a beisei thu sawiin Poshan Maah hi a hawng a. He hunah hian ei tur tha ei tura intiamna (pledge) sawirual niin Anganwadi Worker leh beneficiaries te nen Poshan Walk neih a ni bawk. East Lungdar ICDS Project pawhin CDPO Laldinpuii kaihhruaiin Poshan Maah (Nutrition Month) hawnna hi East Lungdar YMA Run-ah an hmang bawk a ni.

Rastriya Poshan Abhiyaan (National Nutrition Mission) Scheme hi kum 2018 September thla khan bultan a ni a, he Scheme hi Ministry of Women & Child Development hnuaia din niin Poshan Abhiyaan hmang hian India rama naupang than thute, an kum leh an rih zawng inmil lo lutuk te, an san zawng leh an rih zawng inmil lo lutukte nuaibo tum a ni a. Nu-in nau a pai leh pawm laia inenkawlna tha leh eitur tha a hmuh theihna turin hmalak thin a ni a. Poshan Abhiyaan hmang hian ICDS hna lo thawh tawh sa chu thuam chak a ni a, Anganwadi zawng zawnga raipuar, naupang leh naupawm inziaklut zawng zawngte chu uluk lehzuala vil an ni a, hei bakah hian nakin lawka nu la ni mai tur hmeichhe tleirawlte pawh he Scheme hian a huam tel bawk a, an tleirawl lai atanga thisen tlakchhamna laka an him theihna atan hmalakna kalpui a ni bawk.

Poshan Maah chhung hian State Level, District Level, Block Level leh Village Level-ah hmalakna neih tur a ni a. Nu leh naupang hriselna lama hmasawn theih nan leh Indigenous toys Anganwadi Centre-ah awmze nei leh tangkai taka hman anih theih nana hmasawn te, eitur tha leh hrisel siam dan entirna te, Diet lama hmasawn te leh hriselna tih hmanga Video insiam siakna te neiin Anganwadi naupangte buk vek an ni bawk ang.