Cheng vbc. 43.83 senga Tawng lui Lengte kai-a Lei dawh thar, ‘Faith Bridge’ hawn a ni ta

Cheng vbc. 43.83 senga Tawng lui Lengte kai-a Lei dawh thar, ‘Faith Bridge’ tia hming vuah chu nimin khan Chief Minister Lalduhoma chuan a hawng.
Lei dawh thar hawnna hunah hian Chief Minister Lalduhoma chuan kum 2024 December thlatir lamah khan a Lei chhuat hi Crane hmanga hnuhkai tum a nih thu leh a khaina hrui pakhat chatin an hlawhchham tih a sawi a. “Hun engemaw chen an han inbuatsaih leh a, April ni 7, 2025-ah hnuhkai an han tum leh a. Contractor-ten Kristian Puithiam-in hlan hmasa se an ti a, Lengpui Pastor Rev. Lalchungnunga Hauhnar in a hlan a. harsatna tawk lovin awlsam takin an hnukkai ta a. A hminga ‘Faith Bridge’ han phuah pawh hi a inhmeh viau a ni,” tiin he Lei dawh thar hi Mamit District panna kawng pawimawh ber a nih avangin kawng hrang hranga a pawimawh dan a tarlang a. “Lei pawimawh tak ni mah se kum tam tak chhung chu Bailey Bridge dawhkai a ni a. Bailey Bridge te hi an load lak theih a hniam a. Load restriction-te siam a ngai a. Lengte kai Lei pawh hi tum thum, kum 2006, 2014 leh 2015-ah te khan a chim a ni,” tiin Lei chak tak dawhkai a nih tak thu leh Load restriction avanga unload ngai thin ang chi kha chu a awm tawh lo tura ngaih a nih thu a sawi bawk.

He Lei dawh nan hian Ministry of Road Transport & Highway (MORTH) chuan pawisa rawn sanction-in kum 2021 March ni 27 khan a thawktu turte ruat an nih thu leh Agreement ang chuan kum 2023 March ni 27-a thawk zo tura tih a nih thu Chief Minister chuan a sawi a, amaherawh chu Lei khaina hrui a chah hnuah April ni 7, 2025 khan pawhkai niin September ni 10, 2025 khan hna zawng zawng an zofel ta tih a sawi a. Sum petu MoRTH leh a thawktu PWD chungah te, Design Consultant M/s Force Structural Engineering Pvt Ltd., Navi Mumbai chungah te, Proof Consultant IIT Bombay chungah te, Safety Consultant M/s Engineering Project Consultants, Thane chungah te leh Contractor Poddar Infra Tech chungah te lawmthu a sawi bawk.

He Lei dawh nan hian Ministry of Road Transport & Highway (MORTH) chuan cheng vbc. 42.44 ruahmanin sum sen belh nen vbc. 43.83 sen a ni a, Load Capacity hi MT 385 niin Contractor hi Poddar Infra Tech niin a Lei chhuat pawhkai tak rih zawng kha MT 430 MT a ni a, khawvela hrui hmanga lei thir hnuh kai rit ber zinga mi nia sawi a ni. He Lei hi meter 100-a sei niin Meter 7.5 a zau, a sir tawna mihring kalna tur Meter 1.5-a zau footpath a ni a. Bridge structure hi Rourkela-ah siam niin a part hrang hranga phurh thlen niin zawmkhawm chawp a ni a. Bridge hangers atan hian Thailand rama a bik taka siam Carbon Steel Tension Rods hmangin Lei dawh zawh a nih hnuah load Test neih a ni a, Test result thain lirthei eng chi pawh tlan thei tura ngaih a ni.

Lei hawnna hun hi PWD Commissioner & Secretary, V. Lalsangliana chuan kaihruaiin PWD Minister Vanlalhlana leh Bialtu MLA leh Adviser to Chief Minister, TBC. Lalvenchhunga te pawhin thu an sawi bawk a ni.