Serchhip-a END hnathawh dan a hmunah rawn enfiah

Excise & Narcotics Department-a Commissioner, Z. Lalhmangaiha chuan Annual Inspection neiin nimin khan Serchhip a rawn tlawh a, Serchhip-a an Department-a thawktute nen an inkawm nghal bawk.
Serchhip rawn tlawhtu Excise & Narcotics Department-a Commissioner Z. Lalhmangaiha hi Serchhip-a Asst. Commissioner of Excise & Narcotics, Malsawmkima leh a thawhpui ten lo dawngsawngin, Serchhip-a an Department Quarters leh tuna Quarters sak mek te a  hmunah a en a, hemi hnu hian Serchhip P&E Veng-a an Department Office tlawh lehin an hnathawh dan leh an bungraw neih hrang hrang an enkawl dan te a enfiah bakah document an vawn dan te a enfiah a, lirthei an neih mek dinhmun te a en bawk a ni.

Hemi hnu hian Serchhip-a Excise & Narcotics Department Office-ah thawktute nen inkawmna hun hmangin theihtawp chhuaha an hna te thawk turin a fuih a, sawrkar hmalakna hrang hrangte pawh tarlangin, tunhnaiah Serchhip-a END a thawktu mi pathum chu hmundang ah sawn an nih thu leh thawktu mi panga (5) rawn dah an nih dawn thu a sawi a. “Quantity-ah tam lo mah ila Quality lam ngai pawimawh ila, mahni hna theuh chu hlim tak leh zah taka thawk chungin lungawi tak leh chapo lovin i thawk tlang ang u,” tiin a fuih a ni.

Tun dinhmunah Serchhip-ah hian Excise & Narcotics Department hi Asst. Commissioner hovin Sub-Inspector 4, Asst. Sub-Inspector 1, head Constable 4 leh Constable 19 an awm mek a, Excise & Narcotics Department-a Commissioner hian Serchhip-a hun a hman zawh hnuah Hnahthial a pan leh nghal a ni.