Lenkawl

Lok Sabha Inthlanpui neih tur atana Campaign chuan a vawrtawp a thleng chho mek a, Candidate mi 6 zinga mi 4 te chuan Serchhip-ah hun an hmang tawh a ni.

Naktuk Pathianni zan thleng awh tur Presbyterian Kohhran hnuaia Rampum huap Pavalai Pawl Intawhkhawmna chu nizan khan East Lungdar khua ah neih tan a ni.

Lok Sabha Inthlanpui neih turah Serchhip District-a Absentee Voters Essential Service (AVES) te tan tun thla ni 13 atanga 15 chhung khian Postal Ballot hmanga Vote thlakna hun hawn a ni dawn a, he ruahmanna hnuaia Vote thlak phalsak te tan zing dar 9:00 atanga tlai dar 5:00 thlengin Serchhip DC Office-a SDC-I Room ah Vote hi thlak theih a ni dawn a ni. Candidate ten an duh chuan an aiawhin Vote thlak lai endiktu tur Agent an ruat (appoint) thei a. Candidate te emaw, an Election Agent ten anmahni hmingin Appointment hi ziakin an siam thei ang. PVC Agent ruatna atan Form-10 (format for appointment of Polling Agents in Polling Stations) hman theih a ni.

BJP Mizoram Pradesh hruaitute chuan nimin khan Aizawl Press Club-ah an Spokeperson Lalremsangi Fanai hova thuthar thehdarhtute kawmin Congress hotuten BJP chu Kristiante nuai chimih tumtu, Secular paihbo tumtu, UCC kalpui tumtu leh Article 370 lakkian chungchang sawi zawma Mizo mipuite sawithaihna tawngkam an chhakchhuak fo chu tha lo an ti hle tih an sawi.

Mizoram Lok Sabha inthlanpui lo awm tura Independent Candidate Lalhriatrenga Chhangte leh Party hrang hrang Expenditure Agent-te chuan nimin khan ECI Sr. Principal Secretary hnenah Mizoram Election Expenditure Observer-te laka lungawi lohna an thehlut a. He inthlanna a Returning Officer leh Aizawl DEO Nazuk Kumar hnena lehkha an thehluh ah hian Expenditure Observer-te'n Independent Candidate a puh dan an duh loh thu te, Expenditure Agent leh Assistant Expenditure Observer-te laka a khawsak dan chu a fimkhur loh thu te an tarlang a, hmun thenkhat ah General Observer tihtur an lo tih thute an tarlang tel bawk a ni. He lungawi lohna lehkha hi ECI-ah Mail hmangin an thawn bawk a ni.

Governor Dr Hari Babu Kambhampati chuan nimin khan Raj Bhavan-ah Ambassador designate to Myanmar Abhay Thakur IFS chu kawmin India leh Myanmar inkara sumdawnna tha leh awlsam zawk neih anih theih dan tur kawng hrang hrang an sawidun a, Abhay Thakur chuan Governor chu tunhnaia Indo-Myanmar sum-dawnna tih awlsam anih theih dan tura hmalakna awm mekte chu a hrilh a, Chief Minister nena an inkawmna chungchang a sawi tel bawk a ni. Abhay Thakur IFS hi India ramin G20 Presidency a chelh laia Sous-sherpa kha niin G20 hlawhtlinna khan India ram chu khawvel mit hmuhah nasa takin a chawisan thu a sawi a. Tun thla, April ni 29 atang hian Ambassador designate to Myan-mar nihna hi Official-in a chelh tan ang.

Mizoram Police chuan thuchhuah siamin hnamdang sumdawng hnen atanga pawisa chhuhsak kaihhnawihah mi pathum Lalzarzova (47), Mauchar, HPC-D Cadre Lalropianga (38), Thingpuikual, Manipur leh Lalmuankima (34) Mauchar te chu March 25, 2024 khan manin thubuai siam sak an ni tih an tarlang a. CID (SB) hnuaia Special Operation Team chuan Saipum, Kolasib District-ah NEEPCO/Tuirial Hydel Project leh Mauchar khaw inkar kawnga hnamdang sumdawng hnen atanga pawisa chhuhsak kaihhnawiha man an ni tih tarlangin, Lalzarzova hi Heroin man thubuai ah kum 10 tang tura rel tawh niin an tarlang bawk.

Directorate of School Education Department hnuaia Aizawl khawpui chhung Veng pathum a Model Centre for Critical Life Skill and Occupational Skill Development Programme kalpui kharna hun chu nimin khan neih a ni a. He Programme-in a tum ber chu ziak leh chhiar thiamlo thiam tir a, an thiamna thlah tawh lova vawn nun dan tur leh Learning environment siam sak te, khawvel hmasawnna inher danglam ang zela an nitin nuna nuna harsatna thleng thin te hmachhawna inhaichhuak thei tur leh an Skill haichhuah saka tihhmasawn leh eizawnna ngelnghet nei thei tura training pek te a ni.

Mizo Zirlai Pawl (MZP) General Hqrs. chuan nimin khan Emergency Meeting neiin MPSC hnuaia Combine Competitive Examination lak hnuhnung berah, Answer Paper leh Mark Tabulation-ah mark thenkhat thaichhiat leh Correction fluid nasa taka hman a nih avanga thuchhuah an lo siam tawh leh heng buaina zawng zawng avangin MPSC Chairman JC. Ramthanga chu mawh laa bang tur leh hemi hnuah pawh April 12, 2024 ralhmaa bang tura an ngen nawn leh in awmzia a neihloh avangin karleh Thawhtanni, April 15, 2024 atangin MPSC Chairman pisa kai tur dan nise an ti a. Mizo mipuite thlawpna an ngen tih an sawi bawk.

Mizoram Truck Owners’ Association (MT-OA) hruaitute chuan Bairabi Rel Station-a Rel lut leh chhuak mumal lo tak avanga harsatna an tawh chungchang chu nimin khan Governor Dr. Hari Babu Kambhampati hnenah an thlen a, Bairabi Railhead atanga Mizoram hmun hrang hranga buhfai dahkhawlna hmunah Buhfai phurh sak turin FCI Contractor-te hnuaiah an inhlawh tih Larsap chu hrilhin, tun dinhmunah Rel luh leh chhuah dante a mumal lo hle a. Hei vang hian MTOA hruaitute te chuan Truck neituten harsatna nasa tak an tawk mek tih Governor hnenah hian an thlen a, Bairabi Station chuan hmunhma, hmanrua leh thawktute a neih that tawk loh avangin hmun chep takah Truck tam tak inhnawhkhawm a ngai tih an sawi a. Hei vang hian a hun takah bungrua te an hlan thlak theih loh phah thin tih sawiin, he an harsatna te sutkian a nih theih nan Governor chu Railways hotute leh FCI hotute biaksak turin an ngen a ni.

State Designated Agency for Energy Conservation, Electrical Inspectorate, P&E Department buatsaihin ni hnih (2) awh tur Electric Vehicle Roadshow chu nimin atang khan Aizawl-a Millennium Centre tualzawl-ah neih tan a ni.

Godrej Agrovet Ltd. enkawlna hnuaiah Kolasib leh Mamit District chhungah Oil Palm huan siam an pung zel.

Lirthei a khalh laia nungcha kawng kan lai a helna lama lirthei-a chesual leh boral zui ta Lalrinchhana (37), Kawrthah khua chu Mizoram District hrang hranga Honorary Wildlife Warden-te chuan nimin khan ralna leh chawimawina thuziak an hlan.

Mizoram Lok Sabha Inthlanpui neih tura Candidate hrang hrangte chuan ngawrh takin Campaign an nei mek zel.

AICC General Secretary leh Union Cabinet Minister hlui Jairam Ramesh chuan Prime Minister Narendra Modi kaihhruai sawrkarin mahni ramchhunga buaina a chinfel theihloh avangin ram thenawm Myanmar a mawhpuh niin a sawi a, BJP Sawrkarna hnuaia kum 2018-a kalpui tan Free Movement Regime chu tihtawp a ni dawn tih a sawi bawk.

Lok Sabha Inthlanpui neih tura Independent Candidate Lalhriatrenga Chhangte chuan Mizoram MP atan thlantlin a nih chuan mipuite nen an inbiaka an inkhawmna atan thla tin hun siam a tum thu sawiin, Independent atanga thlantlin a nih chuan Mizoram mipuite tan a tangkai thei zawk dawn niin a sawi bawk.

Lok Sabha Inthlanpui neih turah Serchhip District-a mahni In lama Vote thlak thei turte chu nimin atang khan an chenna In-ah kalchilhin Vote thlak tir tan an ni.

Tun thla ni 19-a Mizoram Lok Sabha Inthlanpui neih turah Serchhip District pumah Vote nei thei 54,607 an awm a, an zinga 414 te chu Service Voters an ni.

Serchhip-a Excise & Narcotics Department leh Serchhip Sub-Hqrs. YMA Anti-Drug Squad te chuan nimin zing dar 9:30 vel khan Chhiahtlang dai, Lamchhip kawng (Darzika Road) peng-ah Heroin nia hriat Hawng 10 an man a, heng ruih-hlo an man hi gram 119.46-a rit niin a neitu nia hriat Lalchhanhimi (47), Chhiahtlang Hmar Veng nia insawi pawh manin thubuai siam sak nghal a ni. Heng damdawi te hi chawhmeh (thlai rah) karah thuhruk a ni.

Mizoram Lok Sabha Inthlanpui tun thla ni 19-a neih turah Vote nei thei mi 8,56,364 an awm a, Vote nei thei zingah Mipa aiin Hmeichhia an tam zawk a ni.