Lenkawl

Serchhip Sub-Hqrs. YMA chuan nimin tlai khan Serchhip Sub-Hqrs. YMA Office Meeting Hall-ah SEC Meeting an nei a, he hunah hian kumin 2022-2023 chhung atana Serchhip Sub-Hqrs. YMA Committee hrang hranga hruaitu tur inruat thar a ni a, tun tumah hian Committee 14-a hruaitu tur inruat thar niin Committee then-khat ah hruaitu thar ruat an nih laiin a tam zawk ah chuan hruaitu dinglai te a thara ruat an ni.

Nizan thleng khan Serchhip District-ah COVID-19 hri kai enkawllai mi 28 an la awm.

Mizoram khawpui hrang hranga hman turin Eirawngbawlna Gas man bithliah thar a ni.

National Institute of Electronics and Information Technology (NIELIT), Samagra Shiksha - Mizoram leh Mizoram IT Society te tang tlang in an buatsaih kar khat awh tur School Teachers te IECT Technologies zirtirna hun chu nimin khan neih tan niin Batch 6 chhungin mi 600 te training pek tum an ni.

Chakma Autonomous District Council (CA-DC) Budget Session neih mekah nimin khan Chief Executive Member Rashik Mohan Chakma rin-tawklohna Motion chu Kali Kumar Tongchangya chuan pulutin MDC 20-ah 13 ten an thlawp avangin CEM nilai chu paihthlak a ni a, tun term-a CEM nilai tum 4 paihthlak an nihna a ni.

Mizoram Legislative Assembly kum 50 tlin lawmna Vawiin-a neih tur hmanpui tura rawn kal Assam Legislative Assembly Speaker Biswajit Daimary chuan nimin tlai khan Chief Minister Zoramthanga chu a chenna, CM Bungalow-ah kawmin Chief Minister leh Assam Legislative Assembly Speaker hian State pahnih inlaichinna leh economy lama thuang hrang hranga hmasawnna chungchang an sawidun a. Tunhnaia Bamboo Link Road Pilot Project atanga sawrkar laipuiin sum a pek chungchang leh hmalak zel dan tur te sawiin, economy chawikang thei tur eizawnna ngelnghet (sustainable source of income) siam a pawimawh thu te an sawidun a ni.

Nimin tlai dar 5:00 thleng khan Mizoram-ah COVID-19 hri kai enkawllai mi 176 la awmin Mizoram-ah hri kai dinhmun chuan ziaawm lam a pan ve hret hret a ni.

Lok Sabha Speaker Om Birla chuan Mizoram Legislative Assembly Golden Jubilee chibai a buk.

Mizoram Legislative Assembly kum 50 tlinna, Golden Jubilee lawmna kal mekah nimin khan Assembly House Annexe Conference Hall-ah Seminar buatsaih a ni a, he hun hi Chief Minister Zoramthanga chuan khuallian niin a hmanpui a ni.

Tun thla ni 5-a Mara Autonomous District Council (MADC) inthlanna neih a Vote tla te chu nimin khan chhiar niin Seat 25 awm ah party mal-a sawrkar siam thei khawpa chak an awm lo.

Mizoram leh Tripura State inkara tlan tur 'Hnam Inpumkhatna Bus' tia vuah chu nimin zing khan Chief Minister Zoramthanga chuan Directorate of Transport Office tual atangin a vailiam a, he Bus hi Aizawl (Mizoram) leh Behliangchhip (Tripura) inkara tlan tur a ni.

State Level Sub Committee on Green Mizoram chu nimin khan thukhawmin kumin a ‘Green Mizoram Day’ hman dan tur an sawiho.

Agriculture Minister C. Lalrinsanga chuan Vaimim leh Bekang hralhna turin Ministry of Agriculture an dawr thu sawiin, “Price Support pawh min pek theih tur thu tawngkamin min tiam,” a ti a, “Agriculture leh department hrang hranga hma kan lak tawhna leh lak mekte hi Zoram tan chhinchhiah tlak tam tak a awm tawh a ni,” a ti bawk.

Serchhip atanga Hriangtlang khaw panna kawng chhuat tlabal chu siamthat ala nih loh avangin April 14 atang khan lirthei-a Hriangtlang khua tlawh turin Dawngzawl lamah hel ala ngai a, Hriangtlang khaw panna kawng hi Sailiam-kawn bulah NH. 54 kawngpui laih avangin kawng chhuat a bal a, kawng lai leh tur hian mimal ram lak ngaiin hemi chungchangah hian ram neitute leh sawrkar bakah Hriangtlang VC leh YMA Sub-Hqrs. Serchhip te chuan hma la mah se tun thlengin sum leh pai-ah inremna an la nei thei lo nia thudawn a, helai ram neitute hian a tira sum an phut aia tam tunah hian an phut leh niin kan thudawnna pakhat chuan a sawi a ni.

Serchhip-ah Gas Home Delivery kalpui a ni ve dawn ta - Laldinpuia, Secretary Serchhip District Consumer Association

Serchhip-a AH&Vety Department chuan Inrinni khan SEDP hnuaia Ar vulh Pilot Project hnuaia Rainbow Rooster thlangtute leh Article 275 hnuaia Ar vulh tura thlan te hnenah Ar note leh a Chaw an semchhuak.

Serchhip District Volleyball Championship-2022 chu Inrinni khan khelh zawh a ni. New Serchhip Volleyball Court-a khelh Serchhip District Volleyball Championship hi Inrinni khan Final khelh niin Hmeichhe lamah Bungtlang VC chuan Vengchung VC chu 3-2 (25-22, 15-25, 25-14, 23-25, 15-9) a hnehin an champion a. Mipa lamah Keitum Kawn Veng VC chuan Bungtlang VC chu 3-2 (25-13, 28-26, 27-25) a hnehin an champion bawk a ni. Tarlan tawh angin he Championship-ah hian Mipa Team 11 leh Hmeichhia Team 5 an tel a ni.

Nimin tlai thleng khan Serchhip District-ah COVID-19 hri kai enkawllai mi 25 an la awm.

Serchhip District Rifles Asssociation (SD-RA) buatsaih Serchhip District Shooting Championship chu Zirtawpni leh Inrinni khan Serchhip ah neih a ni.

Mara Autonomous District Council (MA-DC) inthlan vawi 12-na tun thla ni 5-a neih a Vote tla te chu Vawiin hian Siaha-ah chhiar a ni dawn ta a, he inthlanna hi MDC bial 25-ah neih niin Vote tla te hi Vawiin chawhma dar 10:00 atang hian chhiar a ni anga, chawhnu lamah chuan Party hrang hrangte seat lak dan hriat theih beisei a ni.