Mizoram leh Tripura inkara 'Hnam Inpumkhatna Bus' service tur Chief Minister in a vailiam

Mizoram leh Tripura State inkara tlan tur 'Hnam Inpumkhatna Bus' tia vuah chu nimin zing khan Chief Minister Zoramthanga chuan Directorate of Transport Office tual atangin a vailiam a, he Bus hi Aizawl (Mizoram) leh Behliangchhip (Tripura) inkara tlan tur a ni.

'Hnam Inpumkhatna Bus' vailiamna puala inkhawm tawi neih ah Chief Minister Zoramthanga chuan hripui leng avanga tih hlawhtlin lawk theih loh, tuna Mizoram leh Tripura Zofate khua inkara Bus a service thei ta chu lawmawm a tih thu a sawi a. Khawthlang lam, Tripura panna kawng chu tha zawka siam a nih zel thu leh, Tripura sawrkar pawhin an ram chinah hma an lak ve bawk thu sawiin Chief Minister chuan, helai kara Bus leh lirthei dang service ten inkalpawhna nuam zawk an neih a, awlsam lehzuala an service theih beisei a nih thu a sawi a ni. Chief Minister chuan Mizoram hualtu State dang leh ram danga kan unau chengte nen kan inpumkhatna a lo thuk zawk a, awlsam zawka kan intlawhpawh theihna turin hetiang lirthei service hi hmachhawp a nih thu sawiin, kan unaute intlawhpawh chak tak tak te tan remchanna siam sak a, inpumkhatna tha zawk neih theih nan hma lak mek a nih thu a sawi bawk.

He hun kaihruaitu Transport Minister TJ. Lalnuntluanga chuan Hnam inpumkhatna chu sawrkarin a ngaihpawimawh pakhat leh a thiltum a nih thu sawiin, ram leh hnam in hma a sawn theihna tura hmalakna chuan Material Infrastructure ringawt a huam loh thu te, hnam zahawmna leh inpumkhat tha neih tel a pawimawh thu te a sawi a. Hnamdang ngaihsanna leh mahni hnam nihna zahpuia sawi nepna hian hmasawnna tak tak a thlen loh thu leh hmasawnna tluantling nei tur chuan kan Culture a innghat a hmasawn tum a ngaih thu a sawi a ni. Transport Minister chuan Hnam tlem te kan nih thu leh kan hnam hi kan inpawh that a ngai zual hle tih pawh sawiin, tuna Bus Sevice pawh hi chumi rilru pu chunga ruahman a nih thu a sawi a. Zofate kan inpumkhatna hi kan Zo hnam zahawmna leh ropuina a ni, a ti. Bus service na tur atan hian hun khirh lai ber hripui len laia Chief Minister hmalakna in Bus leina tur atana sum mamawhte leh a tul ang ang buaipui a nih dan leh Jampui tlangdung-a kan Zohnathlak unaute nen inkalpawhna tur Hnam inpumkhatna Bus a zara vailiam a ni ta chu lawmawm a tih thu a sawi a, Hnam inpumkhatna chungchangah Zoram pum anga tangrualin, pawl hrang hrang te pawhin an phur chu lawmawm a tih thu a sawi bawk.

'Hnam Inpumkhatna Bus' Service hi Aizawl leh Behliangchhip inkar tlan tur niin, a chuanman (bus ticket man) hi passenger pakhat ah Rs. 476 a ni a, Thawhtanni leh Ningani zing dar 6:00-ah Aizawl atanga chhuakin, Thawhlehni leh Zirtawpni zing dar 6:00-ah Behliangchhip atanga chhuak thin tura ruahman a ni.