Ministry of Agriculture-in Vaimim leh Bekang hralhna turin Price Support pek tawngkam in an tiam

Agriculture Minister C. Lalrinsanga chuan Vaimim leh Bekang hralhna turin Ministry of Agriculture an dawr thu sawiin, “Price Support pawh min pek theih tur thu tawngkamin min tiam,” a ti a, “Agriculture leh department hrang hranga hma kan lak tawhna leh lak mekte hi Zoram tan chhinchhiah tlak tam tak a awm tawh a ni,” a ti bawk.

Nimin-a Aizawl Mizo Hnam Run-a MNF Chhung Inkhawm neih ah MNF Adviser leh Agriculture Minister ni bawk C. Lalrinsanga chuan Vaimim leh Bekang hralhna turin Ministry of Agriculture an dawr thu hi a sawi a, “Price support pawh min pek theih tur thu tawngkamin min tiam a. Central-in 75% an tum dawn a, 25% State-in a tum ve thung ang,” tiin MAHFED Ltd. pawh a lei turin an hmang thei ang tih a sawi a. Vaimim hi Ar leh Sangha chawmna atan te pawh a hman theih tih sawiin, “RKVY hnuaiah ran chaw siamna khawl Serchhip-ah kan din tawh a, District tinah ranchaw siamna khawl din turin hma kan la mek a ni. Vawk leh Bawng chawte pawh phai lam atanga ran chaw kan lakluh tam tak hi kan lo capture thei dawn a ni,” a ti a. Tunah hian Bekang pawh engemaw zat tharchhuah an inbeisei tih sawiin, “A herna khawl leina tur pawh kan peihfel tawh a ni. Bekang kg 6-ah hian a hriak litre 6 a chhuak thei a, a herna fu hi nutrela atan kan hmang zel dawn a ni,” a ti bawk.

Hei bakah hian Agriculture Minister chuan Fu pawh SEDP-a thlangtuten a hmunah an inrem fel tawh tih sawiin, Vai Dailuah senchi chu Behliang dal-a thlak an tum bawk tih a sawi a. “Vai chawhmeh kan lei nasa lutuk hi engemaw zat chu keimahni tharchhuaha intodelh kan tum a, WRC-ah Technology tharin nasa takin hma kan la mek bawk a ni,” a ti a. Zoramthanga kaihhruai sawrkar hnuaia kan leitha hman tur chu a thain a danglam bik hle dawn tih pawh sawiin, “OP.12 CSIR-te siam leitha bik kan chawlut anga, a powder-a siamin kan chulram pawh ram chang tha ah kan siam thei zel dawn a ni. Kan buh leh thlai eichhetu reng reng lo eihlumtu tur kan siam pung anga, chumi atan chuan Lengpui-ah Bio-Control Laboratory kan sa mek a ni,” a ti a. Kan Environment danglam nasa lutuk hian kan sik leh sa a tidanglam nasa tih sawiin, Agriculture/Horticulture/Sericulture-a kan tui mamawh phuhrukna turin Solar hmanga tui pump kalpui mek a nih thu a sawi bawk.

Telhawng chu a hrechianglo ten Social Media lamah an nuihzat tih pawh Minister chuan sawiin, “Mizoram-a kan Telhawng te hi chuan damdawi lam a kengtel a, nakin-ah a thatna hi nuihzattute hian an la hrechiang khawp ang. South East Asia lamah chuan Telhawng hi Thau chhe paih nan an hmang a, an zailep hnuah phoro in an her dip a, taksa-a Colestorol awm paihchhuah nan an hmang a ni. Kan sawrkar chuan thil te tham pawh nise kan ram economy thatna turah chuan a ngai pawimawh zel dawn a ni,” a ti bawk.