COVID-19 hri kai enkawllai tlahniam zel

Nimin tlai dar 5:00 thleng khan Mizoram-ah COVID-19 hri kai enkawllai mi 176 la awmin Mizoram-ah hri kai dinhmun chuan ziaawm lam a pan ve hret hret a ni.

Pathianni khan Mizoram-ah Sample 87 enfiah niin heng atang hian COVID-19 hri kai mi 16 hmuhchhuah belh leh an ni a, Sample enfiah atanga chhutin za zela 18.39 te chuan hri an kai a ni. Heng hri kai hmuhchhuah te hi Rapid Antigen Test hmanga Sample enfiah 83 atang hmuhchhuah vek an ni. Pathianni khan TrueNat Laboratory-ah Sample enfiah pakhat leh Fluorescent Immunoassay Test hmanga Sample enfiah pathum awmin hri kai hmuh erawh an awm lo thung.

Nimin khan Mizoram-ah hri kai enkawl dam mi 59 an awm belh ve leh bawk a, heti hian nimin tlai dar 5:00 thleng khan Mizoram-a COVID-19 hri kai hmuhchhuah tawh chu 2,27,736 niin an zinga 2,26,863 te chu enkawl dam ni tawhin hri kai zingah za zela 99.62 chu enkawl dam an ni tawh a, hri kai enkawllai mi 176 la awmin hri kai zingah mi 697 an boral tawh bawk a ni.

Comments

Chhiar Hlawhte