Chief Minister ho in Mizoram Legislative Assembly Golden Jubilee pualin Seminar nei

Mizoram Legislative Assembly kum 50 tlinna, Golden Jubilee lawmna kal mekah nimin khan Assembly House Annexe Conference Hall-ah Seminar buatsaih a ni a, he hun hi Chief Minister Zoramthanga chuan khuallian niin a hmanpui a ni.

He Seminar-ah hian Chief Minister chuan Golden Jubilee puala Seminar hlawkthlak tak mai buatsaih a ni leh Legislator lo ni tawh leh ni mek tahnem tak an kalkhawm thei chu lawmawm a tih thu a sawi a. Kum 50 chhunga Legislative Assembly kalphungah hmasawnna nasa tak a awm chu lawmawm a tih thu leh felfai tak a rorelna kalpui a ni thin te, House rorelna chhunga ri buai buai thil tha chhuak chuang silo hmuh tur a awmlo te chu entawntlak a tih thu a sawi a. Tun dinhmun hi duhtawk mai tur erawh a nih loh thu sawiin, Jubilee dang pawh Mizoram Legislative Assembly chuan a la hmu leh zel turah beisei chungin, House Activity-ah hmasawn zelin, hmasawn zelna tur leh zir belh zel tur a awm tih hriain Zoram tan ro tha hnutchhiah theih nan Golden Jubilee hi hmasawn zual zel tumna hun lo ni se, a ti a ni.

Nimin-a Seminar hi Assembly Speaker Lalrinliana Sailo chuan kaihruaiin Dr. Kenneth Chawngliana Ex-Speaker chuan ‘Ram hmasawnna tluantling nei tura Legislature-te pawimawhna’ tih hmanga Paper buatsaihin Mizoram Legislative Assembly-a Commissioner & Secretary H. Lalrinawma chuan ‘Legislature leh Executive inlaichinna’ tih thupui hmangin paper an buatsaih te chu ngaihtuah ho a ni. He Seminar-ah hian MLA te, Former Legislators Association of Mizoram (FLAM) member-te leh sawrkar a hotu pawimawh te an tel a ni.

Comments

Chhiar Hlawhte