Lenkawl

Azaadi Ka Amrit Mahotsav Plan hnuaia hmalakna kal mekah nimin khan Serchhip-a Village Council Member te tan Bawlhhlawh sawngbawl dan inzirtirna neih a ni a, Serchhip khawpui chhungah pawh bawlhhlawh paih turte thliarhran a nih tawh dawn thu he hunah hian tarlan a ni.

Serchhip District Medical Superintendent Dr. ZD. Lalmuanawma chuan niminpiah khan COVID-19 hri a kai tih hmuhchhuah a ni a, amah hi tunhnaia hrisel lohna nei sa a nih bakah Oxygen Level a hniam deuh avangin ZMC-a enkawl tura tih niin nizan hmasa khan ZMC-ah lak niin ICU-ah enkawl mek a ni.

Serchhip District-a African Swine Fever (ASF) leng chuan ziaawm lam pan zelin lang mah se nimin thlengin Vawk thi erawh ala awm belh zel a, nimin khan Buangpui-ah Vawk 3 thi lehin Zote South leh Sailulak-ah Vawk thi pakhat ve ve a awm leh bawk a, heti hian Serchhip District-a ASF vanga Vawk thi chu 3711 a tling tawh bawk a ni.

Nimin khan Serchhip District-ah COVID-19 hri kai mi 39 hmuhchhuah belh leh niin hri kai te zingah mi 12 enkawl dam an ni bawk.

Mizoram Sawrkar in Khelo India Scheme hnuaia Khelmual-a Phullem a phah tur atan nimin khan MSSC Complex, Muallungthu-ah lungphum phum a ni.

Champhai leh Hnahlan Grape chingtute Wine siamchhuah dan tur peihvat tum niin Mizoram Liqour Prohibition (MLP) pawh khauh taka kalpui zel tum a ni.

Mizoram-ah I-Lab bun dawn

Niminpiah khan Mizoram-ah Sample 7156 enfiah leh niin heng atang hian COVID-19 hri kai 1380 hmuhchhuah leh an ni a, Sample enfiah zawng zawng atanga za zela 19.28 te chuan hri kaiin Mizoram-a hri kai hmuhchhuah zat ala tlahniam hlei thei lo a ni.

School Education Minister Lalchhandama Ralte chuan Education Department chu COVID-19 hripui leng avanga lockdown tuar ber an ni tih a sawi.

Mizoram Govt. Adhoc Aided High School Teachers Association (MIGAHTA) hruaitute chuan nimin khan School Education Minister Lalchhandama Ralte hnenah a tulna hmun apianga hman turin Ambulance pahnih an hlan.

Health Minister Dr. R. Lalthangliana chuan RT-PCR Laboratory la din lohna District dang zawngah din turin sawrkarin hma a la a, ruahmanna a siam tih a sawi.

Tuikum bialtu MLA leh Assembly Deputy Speker Er. Lalrinawma chuan a bial chhung Chhiahtlang khua a COVID-19 hri kai te enkawlna hmun, 4C siam thar chu nimin khan tlawhin tanpuina a hlan nghal.

Hun engemaw chen buaipui a nih hnuah East Lungdar leh Khawzawl inkar-a 132kV Line chu nimin khan enchhinna neih a ni ta a, nimin tlai dar 3:15 atang khan East Lungdar atang hian 132kV in Khawzawl-ah Electric hi lak niin nizan zan khua khan enchhinna atan lak tura ruahman a ni. Hetianga East Lungdar leh Khawzawl inkar Line hi hman theih a nih chuan Serchhip pawhin Zuangtui-Khawzawl-East Lungdar atangin 132kV in Power a la thei tawh dawn a, Khawzawl pawhin Serchhip atang hian Power lain Saitual leh Champhai te pawh pekchhawn theih an ni tawh dawn a ni.

African Swine Fever (ASF) vangin Serchhip District-ah ni khat-a Vawk thi tam tawh lo mah se Vawk thi erawh ala awm zeuh zeuh a, nimin khan ASF vang hian Serchhip District-ah Vawk pakhat thi ve lehin hei hi Khawlailung khua ami a ni a, Khawlailung-ah hian ASF vangin Vawk 10 lai a thi ve tawh a ni. Heti hian nimin thleng khan Serchhip District-a khaw 35-ah ASF vang hian Vawk 3706 thi tawhin Vawk thi tamna ber Thenzawl-ah Vawk 921 a thi tawh a, Vawk 100 aia tam thihna hi khaw 10 lai a awm a ni.

Serchhip District-ah COVID-19 hri kai enkawllai 514 an awm mek.

Sawrkar hmun tur ruahman

Mizoram-ah COVID-19 hri kai hmuhchhuah zat ala tlahniam thei tak tak lova, niminpiah khan Sample 9494 enfiah leh niin heng atang hian hri kai mi 1846 hmuhchhuah leh niin hei hi Mizoram-ah ni khat-a hri kai hmuhchhuah an tam ber tum a ni leh a, Mizoram-a hri kai hmuhchhuah pawh mi sing kua aiin an tam ta a ni.

Congress Thalaite chuan Sawrkar laipui puihna chauha Vawk hri nasa taka tuartute puih tum chu dik an tihloh thu an sawi.

Mizo Zirlai Pawl (MZP) General Hqrs. hruaitute chu Myanmar atanga raltlan, Mizoram khaw hrang hranga awmte thlamuan tur leh tanpuina pe turin nimin khan an thawkchhuak.

East India leh North East India-a State hrang hrang ten Economy leh Culture-a inkungkaihna nghet zawk an neih theih nana buatsaih ‘East India Summit-2021’ chu nimin khan neih tan a ni.