ZMC-ah Graduation Day hmasa ber hman a ni

Mizoram-a MBBS zirna awmchhun, Zoram Medical College (ZMC)-a zir chhuak hmasa ber, kum 2018 Batch zirlai mi 95 te Graduation Day chu nimin khan ZMC, Falkawn-ah hman a ni.

Kum 2018 August thlaa ZMC hawn a nih atanga Batch hmasa ber, MBBS zirlai Graduate lawmna hun hi Health and Family Welfare Department Principal Secretary Esther Lalruatkimi chuan khual-lian nia hmanpuiin zirlai graduate thar te chu zirchhuak tawh mahse an zir chhuah thiamna lantir turin bul an tan dawn chauh tih a sawi a, kum lo la awm zel turah leh hna an thawhna hmunah hmasawn tum zel turin a chah a, Medical College puitling tak Mizoram in a neihna kawngah harsatna hrang hrang an tawk tih sawiin, a tirah mi thenkhatin ring tawk lo thin mahse, theihtawpa thawktu leh sawrkar hotute hmalakna avangin tun hun a thleng thei tih a sawi bawk.

Tun tuma Doctor Graduate thar te hi an vaiin 95 niin an zingah hian hmeichhia 57 awmin mipa 38 an ni a, State chhung atanga zirlai 72 awmin All India quota atanga zirlai mi 10 leh Non Resident Indian quota atangin zirlai 13 an awm bawk a ni. ZMC 2018 Batch ah hian a tirah mi 100 awmin zirlai pakhat chu hnawhchhuah a nih bakah zirlai pahnih chu an boral bawk a, midang pahnih erawh an hlawhtling zo ta lo thung a ni.