Kumin hian Mizoram-ah kumdang aiin khua a lum lutuk chuanglo

Kumin hian Mizoram-ah khua lum hle mah se kum dang aiin a lum chuang lo nia thudawn a ni a, tuna khawlum lumna bak hi a lum belh vak rin a ni lo.

Science & Technology Department thawktute sawi danin an record atanga a lan danin kumin hian khaw lum ber tum chu April 28, 2024 kha niin hemi ni hian 32°C a kai a, kum dang nen ngaihtuahin khua a lum hran lo tih an sawi a ni. Science & Technology thawktute chuan India rama sik leh sa lam buaipuitu, India Meteorological Department (IMD) nen pawh an inbepawp reng tih sawiin, State thenkhata khaw lum awm (heat wave) ang kha Mizoram-ah chuan awm turah an dah ve lo tih an sawi a. “Khaw lum hlauhawmah chuan IMD hian Heat Wave warning a pe thin a, hetiang a thlen dawn chuan ruahmanna siama inralrin a ngai thin a. Mizoram erawh Normal Temparature an ti a, plan siam ngai zingah min dah ve lo a ni,” an ti.

Hetih lai hian record an lakna hi Aizawl a nih avangin hmun hniam lai deuh - Sairang, Tlabung, Zawlnuam leh hmun thenkhatah chuan hei ai hian khua hi a lum zawk tih an sawi a. Khaw lum leh vawt tehnaah Mizoram chu sang lo mah se a lum chhan chu ramngaw a tlem vang leh hnawng a tam vang nia sawiin, “Mihring pung zelah boruak tidaitu thing kan kit nasa a, kan khawpui nise building a insi thup bawk a. Khaw lum hi kan siam chawp a ni,” tiin Science & Technology Department-a thawktute chuan an sawi bawk a ni.

IMD-in India ram chu kumdang aia lum zual tura a tih laiin Mizoram erawh normal turin a dah niin an sawi bawk a, Science & Technology Department chhinchhiah danin nikum khan January leh February-ah ruahtui a tla lo a, March atangin a tla a. Kuminah chuan Mizoram hian thla tin ruahtui a la dawng ziah a ni.

Nikum chhung veka khaw vawh ni ber chu January 19 kha niin hemi ni hian 10°C a ni a, khaw lum ni ber chu April 16 niin hemi nia khaw lum lam chu 33°C a tling a. Chhinchhiahna atanga a lan danin kum 10 kalta (2014-2023) chhunga khaw vawh ni ber chu January 13, 2017 niin hemi nia khaw vawh lam chu 2.7°C a ni a, khaw lum ni ber chu April 13, 2017 niin hemi nia khaw lum lam chu 36.5°C a tling bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man