Champhai-ah POCSO kaih-hnawih thubuai a tam

Champhai District Child Protection Unit-ah nikum chhung khan kum tlinglo pawngsual leh khuai-khem thubuai 17 chhinchhiah a ni.

Champhai District Child Protection Unit in an chhinchhiah danin Child Welfare Committee (CWC)-ah sawrkar kum kalta khan thubuai 132 ziahluh a ni a. Heng zinga thubuai tam ber chu retheihna avanga harsatna tawk niin thubuai 71 a awm a. Pawngsual leh khuaikhemna kaihhnawihah thubuai 17 neiin, HIV kaihhnawih case 14 an nei tel bawk a ni. Cham-phai DCPU chuan kumtling lo pawngsual leh khuai-khemna tam berah hian pawikhawihtua puhte chu an chhungkhat laina hna leh thenawm khawveng te an ni tlangpui thin tih an sawi a. Mi hran daih leh hmelhriat lohte pawikhawihna a awm ngai meuh lo tih an sawi bawk.

Dan kalha kumtlinglo te chetna lam buai-puitu Juvenile Justice Board (JJB)-ah sawrkar kum liamta khan case 33 ngaihtuah a ni bawk a. Case tam ber hi rukruk thubuai niin 10 a awm a. ND&PS Act kaihhnawih Case 11 leh POCSO Act bawhchhiatna 4 te a awm tel bawk a ni. Champhai DCPU hian March thla khan naupang 130 te hnenah zirna senso, damdawi-a inenkawlna leh a danga hman tur, Sponsorship sum fai chu an lo pe chhuak tawh bawk a ni.